भांगरभूंय | प्रतिनिधी
आदेश पंचायत सचिवान केलो जारी, आरक्षणाक आव्हान दिवपी याचिकेचेर २५ नोव्हेंबराक सुनावणी
पणजी : जिल्लो पंचायत वेंचणूक फुडें धुकलपाचो निर्णय सरकारान घेतला. ती आतां १३ च्या जाग्यार २० डिसेंबराक जातली. हे विशींचो आदेश पंचायत सचिवांनी जारी केला. मजगतीं, मुंबय उच्च न्यायालयांत आरक्षणाक आव्हान दिवपी याचिकेचेर फुडली सुनावणी २५ नोव्हेंबराक जातलीे. फुडली सुनावणी जाय मेरेन वेञचणुकेची अधिसुचवणी जाहीर जावपाची शक्यताय नाशिल्ल्याची म्हायती ऍडव्होकेट जनरल देविदास पांगम हांणी दिली. हाका लागून २५ नोव्हेंबर उपरांतूच वेंचणुकेची अधिसुचवणी जारी जातली.
राज्य वेंचणूक आयोगान जिल्लो पंचायत वेंचणुकेच्या आरक्षणाची अधिसुचवणी जारी केल्या. हे अधिसुचवणेक मॅनुएल बोर्जीस, गजानन तिळवे आनी मोरीनो रिबेलो हांणी गोंयच्या मुंबय उच्च न्यायालयांत आव्हान दिलें. ही याचिका सुनावणेक येवचे पयलींच सरकारान जिल्लो पंचायत वेंचणूक एका सप्तकान मुखार धुकलपाचो आदेश जारी केलो. सुनावणे वेळार सरकार आनी राज्य वेंचणूक आयोगान प्रतिज्ञापत्र सादर करपा खातीर वेळ मागलो. न्यायालयान २५ नोव्हेंबर मेरेन वेळ दिली तेन्ना याचिकादारां वतीन तो मेरेन तारखेची अधिसुचवणी जारी करची न्हय अशी मागणी केली. ऍडव्होकेट जनरलान हाका सहमती दाखयल्या.
वेंचणुकेची अधिसुचवणी २५ नोव्हेंबर पयलीं जाहीर करचो न्हय असो आदेश जरी नासलो तरी जाय तितलो वेळ आशिल्ल्यान ती सुनावणे पयलीं जाहीर करपाची गरज ना. याचिकेंत आरक्षणाक आव्हान दिलां. सर्वोच्च न्यायालयाच्या आदेशा प्रमाण ट्रिपल टेस्ट अट पुराय करतना आरक्षण दितना केल्या. राजकीय मागासलेपण, लोकसंख्या हांचो विचार करून आरक्षण जाहीर जालां. अभ्यास करून प्रतिज्ञापत्र सादर करतले, अशें देविदास पांगम, ऍडव्होकेट जनरल, हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
