भांगरभूंय | प्रतिनिधी
पणजीः गटारां नितळ करप तशेंच झाडां मारप ह्या कामांनी पयश्यांच्या गैरवेव्हाराचो ठपको दवरून गोंय राज्य वेंचणूक आयोगान आगशीची पंच वांगडी आनी आदली सरपंच एमी फर्नांडीस हांकां अपात्र थारयल्या. फर्नांडीस हांणी कसलेंच टेंडर काडिनासतना पंचायत फंडातले पयशे थेट 10 पंच वांगड्यांच्या बँक खात्यांत जमा करून हीं कामां करून घेतलीं. देखून आयोगान ही कारवाय केल्या.
आगशीचे पंच वांगडी हिलारियो परेरा हांणी पंचायत कामांत पयश्यांचो गैरवेव्हार जाला असो आरोप करून पंच वांगडी एमी फर्नांडीस हांचे सयत 11 पंच वांगड्यांचेर गोंय राज्य वेंचणूक आयोगांत याचिका दाखल करून 11 पंच वांगड्यांक अपात्र थारावपाची मागणी केल्ली.
हे सुनावणे वेळार दिसून आयलें की, आगशी पंचायत वाठारांतल्या वेगळ्या वेगळ्या प्रभागांनी गटारां नितळ करप तशेंच झाडां मारप ह्या कामां खातीर पंचायतीन टेंडर काडूंंक ना. ह्या कामां खातीर पंच वांगड्यांच्या बँक खात्यांनी पयशे जमा करून पंच वांगड्यांनी स्वता आपले कामगार लावन हीं कामां करून घेतिल्लीं. पंचायत कायद्या प्रमाण वेंचून आयिल्ल्या पंच वांगड्यांची हें वैधानीक कर्तव्य जायना. तशेंच पंच वांगड्यां वतीन कामगारांक पयशे दिवपाची प्रथा ही सामकी अनियमीत आसा आनी सामान्य अर्थीक नेमांचें (जीएफआर) हें पुराय तरेन उल्लंघन आसा अशें आयोगान नमूद केलें.
आगशी पंचायतीच्या 2022-27च्या कार्यकाळांत तेन्नाची सरपंच एमी फर्नांडीस आनी तेन्नाचे पंचायत सचीव दोगांनीय मेळून चॅकीचेर सय करून पंचायत फंडातले पयशे पंच वांगड्यांच्या बँक खात्यांत जमा केल्ले. जून 2023 ते डिसेंबर 2023 फर्नांडीस हांणी पयलीं रु. 75,000 आपल्या बँक खात्यांत जमा केले. उपरांत उरिल्ले 4.25 लाख फर्नांडीस आनी सचीव ह्या दोगांनीय मेळून 10 पंच वांगड्यांच्या बॅंक खात्यांत जमा केले.
हो प्रकार पुराय अर्थीक गैरवेव्हार आशिल्ल्याचो ठपको दवरून राज्य वेंचणूक आयोगाचे आयुक्त दौलत हवालदार हांणी पंच वांगडी एमी फर्नांडीस हांकां अपात्र थारावपाचो आदेश दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
