भांगरभूंय | प्रतिनिधी
नसबंदी खातीर दरेका सुण्या फाटल्यान मेळटात 1800 रुपया
भांगरभूंय । प्रतिनिधी
पणजी : पंचायती आनी पाल्कां कडल्यान सुण्यांचे नसबंदी कडेन आडनगर जाता. हे खातीर गोंयांत रस्त्याद सुण्यांची संख्या वाडत आसा. नसबंदी खातीर दरेका सुण्या फाटल्यान पशुपालन आनी पशुसंवर्धन खातें पंचायत, पालिकांक 1800 रुपया दिता. तरी लेगीत चडश्यो पंचायती आनी पालिका ताचे खातीर फुडाकार घेनात, अशें पशुपालन आनी पशुसंवर्धन खात्याचे संचालक डॉ. नितीन नायक हांणी शुक्रारा ‘भांगरभूंय’ कडेन उलयतना सांगलें.
फाटल्या कांय वर्सां सावन गोंयांत रस्ताद सुण्यांनी खवदळ घातला. तांचे कडल्यान जावपी हल्ल्यांत खूबशे लोक गंभीर जखमी जाल्यात. कांय दिसां आदीं फोंडें म्हालांत रस्ताद सुण्यांच्या हल्ल्यांत अडेज वर्सां पिरायेचे चलयेक मरण आयिल्लें. रस्ताद सुण्यांक कायद्या प्रमाण मारपाक मेळना, पूण तांचेर नियंत्रण दवरचे खातीर नसबंदीचो उपाय आसा. ही जापसालदारकी पंचायती आनी पालिकांची आसून लेगीत तांचे कडल्यान रस्ताद सुण्यांचे नसबंदी कडेन आडनदर जाता. सुण्यांचे नसबंदी खातीर पशुपालन आनी पशुसंवर्धन खात्या कडल्यान पंचायती आनी पालिकांक दरेका सुण्या फाटल्यान 1800 रुपया दितात, पूण ही जापसालदारकी पशुपालन आनी पशुसंवर्धन खात्याची आसा, अशें सांगून पंचायती आनी पालिका आपली जापसालदारकी फाफडून उडयतात, अशें डॉ. नितीन नायक हांणी स्पश्ट केलें.
मेजणी जाल्या, आंकडो केंद्र सांगतलें
केंद्र सरकाराच्या आदेशा प्रमाण पशुपालन आनी पशुसंवर्धन खात्या कडल्यान गोंयांतल्या जनावरांची मेजणी पुराय जाल्या. पूण हे संबंदांतली आंकडेवारी केंद्र सरकार कांय म्हयन्यां उपरांत जाहीर करतलें. ते उपरांतूच गोंयांत रस्ताद, पोशिल्लीं आनी हिंस्र सुणीं कितलीं आसात, तशेंच हेर जनावरांची संख्या कितली आसा, तें कळटलें, अशें डॉ. नितीन नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
