भांगरभूंय | प्रतिनिधी
पणजी ः सांताक्रूझ पंचायतीचे आदले ग्रामसभेंत घरफाळो वाडपाचो मुद्दो कुशीक दवरून माफी मागपाचो प्रस्ताव थळाव्यांनी मंजूर केल्लो. पंचायत खात्याच्या संचालकान हो प्रस्ताव चुकीचो आसा असो निर्णय दिल्लो. तरी लेगीत पंचायतीची अरेरावी चालू उरल्यार आमी उच्च न्यायालयांत वतले अशें ॲड. सुरेश पालकार हांणी सांगलें. शेनवारा पणजेत जाल्ले पत्रकार परिशदेंत ते उलयताले. ह्या वेळार एल्सा फर्नांडीस आनी हेर लोक हाजीर आशिल्ले.
घरफाळो वाडपा विशीं आनी घर हस्तांतरण शुल्क वाडपा संबंदी सांताक्रूझच्या फाटल्या तीन ग्रामसभांनी गांवच्या लोकांक उलोवपाक दिले ना. फाटल्या ग्रामसभेंत एल्सा फर्नांडिस हांणी हें संबंदी प्रस्ताव मांडिल्लो. पूण ताचेर चर्चा करचे परस एल्सा हांणी आदल्या ग्रामसभेंत चुकीचें विधान केल्ल्याचो आरोप जालो. एल्सा हांणी माफी मागची असो प्रस्ताव मंजूर केलो. हाचे उपरांत लेगीत एल्सा हांच्या प्रस्तावाचेर चर्चा करिनासतना ग्रामसभा सोंपयली.
मुळांतूच एका गांवान ग्रामसभेंत माफी मागची अशा प्रस्तावाक खंयचोच कायदेशीर आदार ना अशें तांणी सांगलें. ग्रामसभेंत लोकांच्या हिता संबंदीत प्रस्नांचेर चर्चा जातली अशी अपेक्षा आसा. कायद्या प्रमाण पंचायत घरफाळो वा हेर शुल्क वाडोव शकता. पूण ताचेर ग्रामसभेंत चर्चा जावंक जाय. हे संबंदी थळाव्यांची मतां जाणून घेवप तितलेंच म्हत्वाचें. सांताक्रूझ पंचायतीची फुडली ग्रामसभा जानेवारी म्हयन्यांत जातली. हे खेपेय ह्या विशयाचेर चर्चा जाली ना जाल्यार आमी उच्च न्यायालयांत वचपाचें थारायलां अशेंय तांणी सांगलें.
ग्रामसभेंनी लोकांक आपलीं मतां उक्तावपाक मेळपाक जाय. पूण सांताक्रूझ पंचायतीचे ग्रामसभेंत लोकांचो आवाजाचेर चेपण हाडपाचो कट चलता. थळाव्यांचे प्रस्ताव कुशीक दवरून ते फकत आपलोच अजेंडा फुडें व्हरतात. सध्या ग्रामसभेंत वचप म्हणल्यार आमच्या जिवाक धोको आसा. अशें आसून लेगीत आमी मुखार आयल्यात. आतां हेर थळाव्यांनी आमकां तेंको दिवपाची गरज आसा अशें एल्सा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
