भांगरभूंय | प्रतिनिधी
मध्यवर्ती सर्वराच्या आदारान हाजेरीचेर आसतली देखरेख
पणजी : गोंयांतल्या सगळ्या 191 पंचायतींनी कर्मचाऱ्यांचे हाजेरी खातीर बायोमॅट्रीक मशिनाच्या आदारान कर्मचाऱ्यांची हाजेरी नोंद जातली. बीडीओ वा पंचायत संचालनालयांत मध्यवर्ती सर्वराच्या आदारान खात्याचे मुखेली हाजेरीचेर देखरेख दवरतले. बायोमॅट्रीक हाजेरीची कार्यवाही खर करपाचे आदेश पंचायत मंत्री मॉवीन गुदिन्हो हांणी दिल्या.
पंचायत मंत्री मॉवीन गुदिन्हो हांणी मंत्रालयांत बायोमॅट्रीक हाजेरीची कार्यवाही करपाविशीं बसका घेतली. कांय मेजक्या पंचायतींनी बायोमॅट्रीक मशिनां आसात. कांय पंचायतींचीं बायोमॅट्रीक मशिनां चलनात. बायोमॅट्रीक हाजेरीचे नोंदीचो नियाळ कोण दवरिना. बायोमॅट्रीक मशिनां बसोवन हाजेरीचो दर दिसा नियाळ घेवपाचे आदेश पंचायत मंत्री मॉविन गुदिन्हो हांणी दिल्या.
कितल्या पंचायतींनी बायोमॅट्रीक मशिना आसात, तांची म्हायती घेवची. कितल्या पंचायतींनी बायोमॅट्रीक मशिनां चलनात, तांची म्हायती खातें घेतलें. नव्यान बायोमॅट्रीक मशिनां हाडून ती पंचायतीनी बसयतले. बायोमॅट्रीक मशिनां हाडून ती बसोवपाक कळाव जावप शक्य आसा. बेगिनांत बेगीन बायोमॅट्रीक मशिनां हाडून तीं बसोवपाच्यो सुचोवण्यो मंत्र्यांनी दिल्ल्याची म्हायती अधिकाऱ्यांनी दिली.
गोंयांत 191 पंचायती आसात. सगळ्या पंचायतींनी सचिवां सयत 700 कर्मचारी आसात. पंचायतीं सयत गटविकास (बीडीओ) कार्यालय तशेंच पंचायत संचालनालयाच्या कार्यालयांत लेगीत बायोमॅट्रीक हाजेरीची कार्यवाही खर जातली. बीडीओ, पंचायत संचालनालय कार्यालय मेळून 300 कर्मचारी आसात. सगळ्या पंचायतींनी एक सचीव आनी कारकून आसतात. कांय पंचायतींनी दोन जाल्यार काय पंचायतींनी चार लेगीत कारकून आसात. दरेका म्हयन्यांत कांय कर्मचारी निवृत्त जातात. हाका लागून कर्मचाऱ्यांचो आकडो सेगीत बदलत आसता, अशी म्हायती अधिकाऱ्यांनी दिली. हे बसकेक पंचायतीचे उपसंचालक प्रसिद्द नायक, जीईएलच्या मुखेल कार्यकारी अधिकारी रेवती कुमार, जीईएल व्यवस्थापक संगिता काडणेकार, पंचायत उपसंचालक (प्रशासन) कृष्णकांत पांगम, पंचायत संचालनालयाचे अधिकारी विराज मळीक, एनआयसीचे विज्ञानीक सातेश रेडकार, एनआयसीचे अधिकारी समीर दातार, इन्फोटॅक म्हामंडळाचे वेंकटेश बबलादी हाजीर आशिल्ले. बायोमॅट्रीक मशिनां हाडपा सयत तांत्रीक सल्लो दिवपाची जापसालदारी गोवा इलेक्ट्रॉनिक्स लिमिटेड आनी एनआयसीचेर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
