भांगरभूंय | प्रतिनिधी
भांगरभूंय । प्रतिनिधी
पणजी : गोंयांतल्या पंचायतींनी अर्थसंकल्पांतले तजविजेंतल्या फाटल्या पांच वर्सांत 41 टक्के निधीचो वापर केला. 59 टक्के निधी वापराविणें उरील्ल्याची म्हायती म्हालेखापाल अहवालांत आसा. पंचायतींक चड अधिकार दिवपी 73 वे घटना दुरुस्तीच्या कार्यवाहीचेर दिल्ल्या अहवालांत म्हालेखापालान हो निश्कर्श काडला.
हाचेर प्रतिक्रिया घेवपाक पंचायत मंत्री मॉवीन गुदिन्हो हांचे कडेन संपर्क केलो तेन्ना तांणी फोनाक प्रतिसाद दिवंक ना. सरकार योग्य वेळार पंचायतीक निधी दिना. हाका लागून पंचायतीक ताचो वापर करप शक्य जायना. भाजप सरकाराक पंचायती घटमूट जाल्ल्यो नाका. सरकाराचे उदासीनतेक लागून पंचायतींक निधीचो वापर करप शक्य जायना, अशें मत आमदार विजय सरदेसाय हांणी उक्तायलां.
2016- 17 ते 2020- 21 ह्या पांच वर्सांत पंचायतीं खातीर वट्ट 213.98 कोटींची तजवीज आशिल्ली. तातूंतले 87.70 कोटीं खर्च जाले. हें प्रमाण 41 टक्के आसा. हाचो अर्थ अर्थसंकल्पांतले तजविजेंतलो 59 टक्के निधी वापराविणें उरलो. दरेका वर्सा कितली तजवीज आशिल्ली आनी कितलो खर्च जालो, हाची म्हायती अहवालांत दिल्या.
2016- 17 त अर्थसंकल्पांत 27.20 कोटींची तजवीज आशिल्ली. तातूंतले 13.12 कोटी रुपया खर्च जाले. हें प्रमाण 48.24 टक्के आसा. 2017- 18 त 33.44 कोटींची तजवीज आशिल्ली. तातूंतले 18.04 कोटी खर्च जाले. हें प्रमाण 53.95 टक्के आसा. 2018- 19 वर्सा अर्थसंकल्पांत 42.04 कोटींची तजवीज आशिल्ली. तातूंतले 21.09 कोटी रुपया खर्च जाले. हें प्रमाण 50.17 टक्के आसा. 2019- 20 त अर्थसंकल्पांत 57.76 कोटींची तजवीज आशिल्ली. तातूंतले 18.64 कोटी रुपया खर्च जाले. हें प्रमाण 32.27 टक्के आसा. 2020- 21 त अर्थसंकल्पांत 53.54 कोटींची तजवीज आशिल्ली. तातूंतले 16.81 कोटी रुपया खर्च जाले. हें प्रमाण 31.40 टक्के आसा. 2017- 18 आनी 2018- 19 हीं दोन वर्सां सोडलीं जाल्यार हेर वर्सांनी अर्थसंकल्प तजविजेंतलो 50 टक्क्यां परस उणो निधी खर्च जाला.
उदरगत कामाचो आराखडो तशेंच पयलीच्या कामाच्या खर्चाची बिलां सादर केले उपरांत पंचायतींक फुडल्या कामां खातीर निधी मेळटा. बऱ्योच पंचायती वेळार आराखडो सादर करिनात, तशेंच खर्चाचीं बिलां सादर करिनात. हाका लागून तांकां निधी मेळपाक आडखळ जाता, अशी म्हायती सरकारी गोपां कडल्यान मेळ्ळी.
पंचायतींक निधी सारको मेळना : एल्टन डिकोस्टा
अर्थसंकल्पांत तजवीज आसली तरी पंचायतींक सारको निधी मेळना. ही गजाल खूब खेपे आपणे सरकाराचे नदरेक हाडून दिल्या. कामाचें एस्टिमेट तयार करपा खातीर पंचायतीं कडेन अभियंते नासतात. हीं कामां सरकाराक करचीं पडटात. हाका लागून पंचायतींक निधी खर्च करप शक्य जायना. तशेंच खूबश्या पंचायतींक वेळारत निधी मेळना. निधी वापराविणें उरपाक सरकार चड जापसालदार आसा, अशें केपेंचे आमदार एल्टन डिकोस्टा हांणी सांगलें.
पंचायतीं आत्मनिर्भर जाल्यो सरकाराक नाका : विजय सरदेसाय
पंचायती वा थळाव्या संस्थांचें सक्षमीकरण जावचें म्हूण 73 वी घटनादुरूस्ती जाल्ली. पंचायतींक अधिकार दिवपा सयत निधी दिवपाची तजवीज आसा. ज्या पंचायतींचेर भाजप कार्यकर्ते पंच, सरपंच आसात, त्या पंचायतींक निधी मेळटा. हेर पंचायतींक मेळना. पंच आनी सरपंच हे घणसा बैला सारके उरचे, अशें सरकाराचें धोरण आसा. पंचायती आत्मनिर्भर जाल्यो सरकाराक नाका, अशें आमदार विजय सरदेसाय हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
