भांगरभूंय | प्रतिनिधी
समाजांतल्या तळागाळांतल्या लोकांची उदरगत जावची, गांव सुदारचो, राहणीमानाचो दर्जो वाडचो, गरिबांक रोजगार, बऱ्यो भलायकी सुविधा मेळच्यो, गरजेच्या सेवे पसून गांव पयस उरचे न्हय, ह्या उद्देशान स्वराज्य संस्था स्थापन जाल्यो. पंचायत ही तातूंतली मुखेल संस्था. मात, देशांतल्या लागीं- लागीं सगल्याच पंचायतींनी भ्रश्टाचार, गैरकारभार जाल्लो पळोवपाक मेळटा. कांय पंचायती हातूंत आडकल्यात, तर उरिल्ल्यो ‘धरली तर चोर, नातर साव’ ह्या प्रकारांत येतात, अशें म्हणल्यार कोणे राग मानचो न्हय. गांवाची उदरगत जावची म्हूण पंचायतींनी सरकारी वा खाजगी प्रकल्प गांवांनी सुरू करपाचो यत्न करपाक जाय. मात, जें कितें करता, तें कायदेशीर पद्दतीन. हालींच हरमलांतल्या गिरकारवाड्यार एक वेगळोच प्रकार उक्ताडार आयला. थंय नो डेव्हेलोपमेंट विभागांत 187 बेकायदेशीर आस्थापनां आसात. तातूंतल्या 64 आस्थापनांची सरकारी यंत्रणांनी पळोवणी केली, तेन्ना 54 आस्थापनांनी वेवसाय चालू आशिल्ल्याचें दिसलें. तांकां बेगोबेग कुलूप लावपाचो आदेश उच्च न्यायालयान दिला. उरिल्ल्या आस्थापनांची फुडल्या 15 दिसां भितर पळोवणी करपाचे निर्देश दिल्यात. तांचोय वेवसायीक वापर जाता जाल्यार तीं बंद करपाक सांगल्यांत. ह्या प्रकरणांत काल आनीक एक भर पडली. सरपंच बर्नार्ड फर्नांडीस हांणी आपल्या पदाचो राजिनामो सादर केला. तांचेर पंचायत खात्यान कारवाय केल्ली. आपली बाजू मांडपाची संद दिनासतना कारवाय केली म्हूण तांणी ह्या निर्णयाक न्यायालयांत आव्हान दिल्लें. पूण अखेरेक तांकां पद सोडचें पडलें.
गिरकारवाड्यार सरपंचांचे बापूय आनी काका हांणी बेकायदेशीर बांदकाम बांदिल्ल्याचें उक्तडार आयिल्ल्यान न्यायालयान हाची स्वता जावन दखल घेतिल्ली. पंचायत संचालकांक हाची चवकशी करून कारवाय करपाक सांगिल्लें. उपरांत ही कारवाय जाल्ली. आतां तांणीच राजिनामो दिला. हाचो अर्थ आरोपांत तथ्य आसा!! हालींच हांगाच कसलेच परवाने घेनासतना एक चार मजली हाॅटेल बांदिल्ल्याचें दिसून आयिल्लें. तें मोडपाचो आदेश दिल्लो. पूण अजून ताका कोणे हात लावंक ना. सीआरझॅड आनी हेर सगल्या विभागांनी, जंय बांदकामां उबारपाक कायद्यान बंदी आसा, थंय बेधडक तीं उबीं जातात. मागीर कांय वर्सांनी ती कायदेशीरूय जातात. हरमलाचीं हीं बांदकामां बेकायदेशीर थारायल्यांत, म्हणल्यार तातूंतल्या कांय जाणांनी परवानेय घेवंक नासतले. ह्या वेवसायिकांक इतलें धाडस जाता, म्हणटकच तांचेर कोणाचे तरी आशिर्वाद आसतले. तांणी दक्षिणा घेतले बगर ते दिल्यात? आस्थापनांचेर कारवाय जाली, पूण हे आशिर्वाद दिवप्यांचें कितें? ह्या बेकायदेशीर बांदकामांच्या धनयांची फाटभूंय तपासून न्यायालयान, सरकारी यंत्रणांनी तांचेर आनीक खर कारवाय करपाची गरज आसा. नाजाल्यार एकलो करता, म्हूण दुसरो करता, ही वृत्ती मुखार चलत रावतली. एकेच कडेन सादारण 200 बेकायदेशीर बांदकामां सांपडप हो योगायोग न्हय…. आनी बाकीच्या गांवांत तपासणी, पळोवणी केन्ना जातली? कारण, हरमला आसा म्हणटकच हेर कडेनूय आसूं येतात.
ह्या प्रकरणा फाटोफाट किर्लपाल – दाबाळ पंचायतींतली एक भानगड भायर सरल्या. थंयच्या क्लार्कान जायत्या जाणांक घरक्रमांक दिवपाक पयशे घेवन बोगस पावती दिल्या. घरपट्टी भरपी लोकांकूय बनावट पावत्यो दिल्यात. नवे सरपंच पदार आयिल्ले तेन्ना लोकांनी तांचे कडेन कागाळ केल्ली. चवकशी केली तेन्ना संबंदीत घरक्रमांकांची पंचायतींत नोंदूच नाशिल्ल्याचे दिसलें. त्यो पावत्यो सरपंचान एकठांयूय केल्यात. ते रोखडेच धारबांदोडें बीडीओ कडेन कागाळ करपाचे आसात. 2016 त संबंदीत क्लार्कान असलोच प्रकार केल्लो. पूण कारवाय करचे बदला ताची बदली जाल्ली. मात विधानसभा वेंचणुके उपरांत तो परत हेच पंचायतींत आयला आनी ताणें आपली ही समाजसेवा परतून सुरू केल्या. अजापाची गजाल म्हणल्यार एकाय मनशाक ताचे आड पुलिशेंत वा सरकारा कडेन कागाळ करपाचें धाडस नाशिल्लें. सोशल मिडियाचेरूय ताच्या विरोधांत कोणें उतर काडूंक ना आसतलें! आतां सरपंचान हें धाडस केलां. हाचो स्पश्ट अर्थ ताचे फाटल्यान कोण तरी राजकी फुडारी आसतलो. ह्या क्लार्का सारके सरकारी जावंय, सुनो आसतकच पंचायती स्थापना करपा फाटलो उद्देश मातये भरवण जाता. देशाक उदरगतीचे तेंगशेर व्हरपाक धडपडपी, न खाऊंगा, न खाने दुंगा, म्हणपी आमच्या प्रधानमंत्र्याच्या कार्यांत आडमेळें हाडपा सारको हो आनी हरमलाचो प्रकार, अशें तुमकां दिसना?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
