भांगरभूंय | प्रतिनिधी
फुडल्या वर्सा जावपी संवसारीक टी-20 क्रिकेट सर्ती खातीर काल भारताच्या 15 वांगड्यांच्या पंगडाची घोशणा केली. हातूंत कांय व्हड बदल पळोवपाक मेळ्ळे.
ओपनर शुभमन गिल आनी विकेटकीपर जितेश शर्मा हांकां पंगडांत सुवात मेळूंक ना. जाल्यार दुसरे वटेन झारखंडाक आपल्या फुडारपणाखाला सैयद मुश्ताक अली ट्रॉफी जिखून दिवपी इशान किशनाचें पंगडांत पुनरागमन जालें. इशानान हे सर्तींत सुमार 200चे स्ट्रायक रेटीन 500 परस अदीक धांवड्यो केल्ल्यो.
शुभमन गिल पंगडांत नाशिल्ल्यान अश्टतासांचो खेळगडो अक्षर पटेलाची उप मुखेली म्हणून निवड केल्या. तशेंच आशिया करंड सर्तींत जैतीवंत शॉर्ट मारपी रिंकू सिंगाक लेगीत पंगडांत सुवात फावो जाल्या. वॉशिंग्टन सुंदर लेगीत पंगडांत आसा. विशेश म्हणल्यार, होच पंगड न्युझिलॅण्डा आडचे पांच मॅचींचे टी-20 माळे खातीर कायम दवरला.
निवड समितीचो अध्यक्ष अजीत आगरकरान गिला विशीं स्पश्टीकरण दितना सांगलें, आमकां एका विशिश्ट संयोजना सयत खेळपाचें आसा. ओपनर म्हणून एकाच विकेटकीपर बॅट्समनाक संद दिल्या पंगडांतलो समतोल अदीक बरो उरता, असो आमचो विचार आसा.
अभिषेक शर्मान फाटल्या एका वर्सां सावन उत्कृश्ट कामगिरी केल्या. आमकां फक्त 15 खेळगडे वेंचपाचे आशिल्ले. ताका लागून कोणाक तरी भायर बसोवचोच पडटलो आशिल्लो. हाचो अर्थ असो न्हय की गिल वा जितेश वायट खेळगडे आसात. पंगड वेवस्थापनाचे रणनिती प्रमाण हो निर्णय घेवचो पडलो अशें आगरकरान मुखार सांगलें.
शुभमन गिलान फाटल्या 15 डावांनी एकूय अर्द शेंकडो मारूंक ना. ताणें 137.26 चे स्ट्रायक रेटीन 291 धांवड्यो केल्यात. दुखापतीक लागून दक्षीण आफ्रिका पंगडा आडचे अखेरचे मॅचींत ताका खेळपाक मेळूंक नाशिल्ले ताचे सुवातेर खेळिल्ल्या संजू सॅमसनान 22 बॉलांनी 37 धांवड्यो केल्यो.
मुखेली सूर्यकुमार यादवान लेगीत गिलाक तेंको दितना म्हणलें, हो फॉर्माचो विशय न्हय, हो फक्त पंगडांच्या रचनेचो भाग आसा. टॉप ऑर्डरांत आमकां एक विकेटकीपर जाय आशिल्लो आनी सकयले सुवातेर रिंकू वा वॉशिंग्टन सुंर हांचे सारके बॅट्समन जाय आशिल्ले. संवसारीक सर्त जिखपाक आमकां दोन-तीन वेगळ्यावेगळ्या पर्यायांची गरज आशिल्ली. म्हणून आमी हो बदल केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
