भांगरभूंय | प्रतिनिधी
शेतांच्या, शेतकारांच्या, लोकांच्या संरक्षणा खातीर करतात प्रार्थना
दिवचल: वायंगण शेताक सुरवात करचें पयलीं शेतांच्या, शेतकारांच्या आनी सामान्यांच्या संरक्षणा खातीर प्रार्थना करपाचो म्हूर्त म्हणल्यार न्हावेली सांखळे गांवांतलो परंपरे प्रमाण चलत आयिल्लो बारस उत्सव व्हड दबाज्यान मनयलो. दर वर्सा चवथीक वामन जयंती दिसा हो उत्सव परंपरे प्रमाण व्हड उमेदीन मनयतात. ह्या उत्सवांत पुराय गांव वांटेकार जाल्लो.
बारस हो न्हावेली गांवांतलो हेर सगल्या उत्सवा मदलो एक उत्सव. पावस सोंपून सुरू जावपी वायंगण शेताचो म्हूर्त ह्या उत्सवांतल्यान सादतात. कोंड्याच्या बडयांनी बांदून तयार केल्ल्या बारसाक पावसाच्या दिसांनी रानांत फुलपी विवीध पानां फुलांनी सजयतात. चौकोनी बारस आनी ताचेर मुकूट अशें ताचें स्वरूप आसता. न्हावेली गांवांत चार मानकरी घराबे आसात. त्या दरेक घराब्याक एक एक वर्स वर्सल ह्या प्रमाण संबंदीत चौगुले मानकरी घराबो ही बारस मनयतात.
हे बरसीक सजोवन तिचे भोंवतणी रांगोळी घालतात. ब्राह्मणा वरवीं शास्त्रोक्त पद्दतीन पुजा जाता. उपरांत ह्या बारसीक दवरतात त्या छिद्रांतल्यान बारा काश्ये उकडें भात, बारा दवले कुविताची शिजयिल्ली पिठी, बारा दवले आळू, पांच पाल्यांची भाजी, उदकांत उकडिल्ले वडे अशे जिन्नस दवरतात. हे जिन्नस दवरतना येजमानाक आपल्या दाव्या गुडघ्यार रावचें पडटा. हे पदार्थ ह्या घराब्यांतली एक बायल पुजा करपी येजमानाच्या हातांत दिता. ते त्या येजमानान बासरेंत दवरचें पडटा. उपरांत बारसीत नाल्लाच्या वळ्याचो दिवो लायतात.
हे बारसीत दवरपा खातीर पिठा पसून जुलो बांदिल्ले दोन बैल (बैलजोडी) आनी नांगरपाचें जूं, एक शेतकार, एक मानगें आनी कांसव तयार करतात. तेवूय सगले जिन्नस आनी दिवो दवरले उपरांत बारसीत दवरतात. हे सगलें भितर दवरून जाले उपरांत तिचे छिद्र करमलच्या झाडांच्या पानांनी बंद करतात. भौशीक सांगणें जाले उपरांत बारस उबारतात. भायर हाडले उपरांत येजमानाचे तकलेर दितात. उपरांत हर्रो… हर्रो… च्या गजरांत ह्या बारसीची मिरवणूक गांवांतल्यान वता. ही मिरवणूक वाजत गाजन शेतांतल्या परंपरीक वाटेंतल्यान न्हंयेचेर वता. न्हंयच्या उदकांत ही बारस विधीवतपणान उदकांत सोडटात. उपरांत गांवच्या ग्रामस्थांक जेवण दितात.
ह्या सुवाळ्यांत बायलां व्हड प्रमाणांत उमेदीन वांटो घेतात. सकाळ सावन ह्या उत्सवाक लागपी सगले जिन्नस तयार करपा पसून ते सगल्यो भाज्ज्यो रानांत आनी वाठारांत भोंवून हाडपाचें काम हीं बायलां करतात. सगले जिन्नस तयार केले उपरांत निमाणें ग्रामस्थांक जेवणाचो आस्वाद दिवपा खातीर हीं बायलां योगदान दितात अशें गौरी गुरूदास गांवस हांणी सांगलें.
न्हावेली गांवांत ही प्रथा आमच्या पुर्वजांनी सांगिल्लें प्रमाण आमी चलयत आसात. पुराय गांवांतले लोक एकठांय येवन हो उत्सव मनयतात. वायंगण शेताचो म्हूर्त सादतना शेतकारांक राखण मेळची अशें ह्या बारस उत्सवाचें म्हत्व आसा अशें विश्वभंर गांवस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
