भांगरभूंय | प्रतिनिधी
भांगरभूंय । प्रतिनिधी
दिवचलः न्हावेली- साखळी हांगच्या सांस्थाचो आख कूळ संघटनेन 20 हेक्टर शेत लागवडी खाला हाडपाचें थारायलां. ते खातीर शेतकार, न्हावेली पंचायत आनी सेझा वेदांता ह्या जोड पालवान शेतांतलो चिखोल काडून उडोवाच्या कामाक सरपंच कालिदास गांवस हाणे सुरवात करून दिली.
फाटल्या जायत्या वर्सां सांवन हें शेंत पडंग दवोरल्लें. आतां शेतकारांनी स्वयंपूर्ण गोंय आनी आत्मनिर्भर भारत ह्या उपक्रमा खाला हे शेत जमनींत पीक घेवपाचें थारायलां. सेझा वेदांता कंपनीन तांका सहकार्य दिलां आनी कॉर्पोरेट जापसालदारकी खाला शेतांतलो चिखोल काडपाचें काम स्विकारलां. एका तेंपार ह्या शेतांत पीक घेतालें. आनी शेतकारांनी तें परत लागवडी खाला हाडपाचें थारायल्ल्यान कृशी क्रांतीक चालना मेळटली अशें सरपंच गांवस हाणे सांगलें.
शेतांतलो चिखोल काडपाच्या कामाक सुरवात करतना सांस्थाचो आख शेतकार संघटनेचो अध्यक्ष दामोदर गांवस, जयवंत गांवस, डिचोली प्रोग्रेसीव फॉर्मर्सचो अध्यक्ष विश्वंभर गांवस, सेझा वेदांत कंपनी वेवस्थापक मिलिंद बर्वे, कोमुनिदाद अध्यक्ष नीरज गांवस, भांडारी शैलेश गांवस हाजीर आशिल्लो.
हाचे पयलीं न्हावेली पंचायतीन आत्मनिर्भर भारत, स्वयंपूर्ण गोंय उपक्रमा खाला जायते कडेन पडंग आशिल्लीं शेतां लागवडी खाला हाडपाक शेतकारांक तयार करपाचें काम केलां. मुख्यमंत्री डॉ प्रमोद सावंत हांणी सांस्थाचो आख शेतकार संघटनेन शेत लागवडी खाला हाडपाचें थारायल्ल्यान तांची तुस्त केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
