भांगरभूंय | प्रतिनिधी
न्हंय येरादारी मंत्री सुभाष फळदेसाय हांचे लेखी जापेंत स्पश्ट
प्रतिनिधी । भांगरभूंय
पणजीः न्हंय येरादारी खातें लुकसाण सोंसून चलता. ते भायर ह्या खात्यांत 11.8 लाख रुपयांची अफरातफर जाल्या. ही गजाल कॅग अहवालांत उक्ती जाल्या, अशी लेखी जाप न्हंय येरादारी मंत्री सुभाष फळदेसाय हांणी दिल्या.
न्हंय येरादारी खात्याच्या फाटल्या तीन अर्थीक वर्साच्या तपशीलाची मागणी सांतआंन्द्रेचे आमदार विरेश बोरकार हांणी केल्ली. हाचेर विधानसभा पटलाचेर म्हायती दितना न्हंय येरादारी मंत्री सुभाष फळदेसाय हांणी सांगलें, खात्याच्या लेखा परिक्षकान खात्याचें अंतर्गत ऑडीट करूंक ना. पूण 31 जानेवारी 2023 मेरेन कॅगान अर्थीक वर्स 2021-22 ते 2022-23 मेरेनचें ऑडीट केलां. पूण 1 फेब्रुवारी 2023 ते मार्च 2024 मेरेनचें ऑडीट कॅगान करूंक ना.
कॅगाच्या अहवाला प्रामाण अर्थीक वर्स 2021- 22स त खात्याच्या कॅश बुकांत गंभीर अनियमितता जावन 11.03 लाख इतल्या महसुलाची अफरातफर जाल्या. कॅश बुकांची सक्तीची तपासणी करपाक कार्यालयाचो मुखेली अपयेसी थारिल्ल्यान अंतर्गत नियंत्रण यंत्रणा दुबळी जाल्या. ताका लागून जी फटीच्यो एन्ट्री केल्यात त्यो नदरे मुखार येवंक ना.
पयशे येतात ताचो सारको अहवाल दिवप ना, चॅक आनी डीडी हांची रिसीट नोंद करिनासतना पयशांनी सूट दिवप, सूट दिल्ल्या पयशांची दोन फावट नोंद करप आनी पयशे येवंक नासतना लेगीत सूट दिवपाच्यो गजाली कॅगान उक्ताडार हाडल्या.
कार्यालयच्या मुखेल्या कडल्यान बाकी रक्कम आनी सूट दिल्ल्या पयशांचो समेट हांचें म्हयन्याचें प्रामाणिकरण करिनासतना एकल्याचें पयशे काडपी आनी वितरण करपी अधिकाऱ्यान कॅश बूक आनी कॅश व्हेरिफिकेशन प्रमाणपत्राचें प्रामाणिकरण केल्लें. ते खातीर ह्या घोटाळ्यांत खूबश्या अधिकाऱ्यांचो हात आसूं येता असो गंभीर दुबाव कॅगान उक्तायला. ते भायर ह्या अधिकाऱ्यान सरकारी कोफरी वांगडा सूट दिवपाची प्रक्रिया करूंक ना. ते खातीर कॅशियरा कडल्यान 11,03,181 रुपयांच्या सरकारी पयशांची अफरातफर जाल्या.
लोकांक आनी दुचाकीं खातीर फेरयेंत येरादारी फुकट आसा आनी खूब उणें शुल्क मोटारींचें घेतात. ताका लागून खात्यांत तसो पळोवपाक गेल्यार कसलोच महसूल येना. 2023- 24 त रु. 68.16 कोटी रुपया इतली तजवीज खात्यांक अर्थसंकल्पांत केल्ली. पूण त्याच वर्सा 2023-24 त 68,27,741 रुपया इतलो महसूल शुल्कांतल्यान एकठांय केल्लो. तातूंत 37 हजार भाड्याचें शुल्क आनी 67,90,741 रुपया हे टोल शुल्क आसा. तशेंच खात्यान 2.63 कोटी रुपया इतलें भाडें वसूल केलां. तिकेट कलेक्टर आनी तरवट्यांनी तिकेटींचो हिशेब दिवंक नाशिल्ल्यान उरिल्ले टोल शुल्कांचे पयशे येवंक ना. सध्या सेवेंत आशिल्ले रॅम्प आनी जेटी अपग्रेड करप, एकूण खर्च आनी येणावळ हांचे मदलें अंतर उणें करप तशेंच खात्याच्या लेखा विभागाच्या कामकाजाचेर नियंत्रण दवरप हे सारकिल्ल्यो गजाली लुकसाण भरपाय भरून काडपा खातीर करतले, अशें मंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
