भांगरभूंय | प्रतिनिधी
सिंधुदुर्गः देड म्हयन्या आदीं गोंयांतल्यान सिंधुदुर्ग जिल्ह्यांत आयिल्लोओंकार हती अजूनय भोंवत आसा. मडुरा मागीर इन्सुली वाठारांत कांय काळ रावून आतां हती बांद्यां पावला. मजगतीं, हांगाच्या तुळसाण न्हंयेंत शांततायेन न्हांवपी ओमकाराचेर कांय अनवळख्यांनी पाचव्या रंगाचे गर्नाल (सुतळी बॉम्ब) आनी माराणे उडयले. ही धक्को दिवपी घडणूक बांदा वाठारांत घडली. गर्नालांच्या आवाजाक लागून ओंकार हती भियेवन खोल उदकांत भितर सरलो. हे घडणुकेचो व्हिडियो सोशल मिडियाचेरूय व्हायरल जालो.
दोन दीस आदीं ओंकार हतयाक कांय जाणांनी बडयेन बडयिल्लो. ती घडणूक अजून ताजी आसतना आतां ही घडणूक घडल्या. हाका लागून जनावर मोगींनी आनी जनावरां खातीर वावुरपी संघटनांनी तिडक उक्तायली आनी हे घडणुकेचो खर निशेध केलो.
रानां खात्याचेर प्रस्न चिन्न
गर्नाल उडोवन हती जखमी जाल्यार कोण जापसालदार? असो प्रस्न जनावर मोगींनी रानां खात्याक आनी थळाव्या लोकांक विचारलो. हती सारक्या रानवटी जनावरांचेर अशे हल्ले चालू आसत जाल्यार तांकां तिडक येवपाची शक्यताय आसता आनी ताका लागून जीवितहानी जावं येता असो भंय जनावर मोगींनी उक्तायला.
न्यायालयाचो सिंधुदुर्ग रानां खात्याक आदेश
शुक्रारा जाल्ले सुनावणेंत सिंधुदुर्ग रानां खात्यान बुधावार सादर केल्लें प्रतिज्ञापत्र न्यायालयान न्हयकारलें. ओंकार हतयाक कशें धरतले आनी वन्यजीव संरक्षण कायद्या प्रमाण रानवटी जनावरांक धरपा खातीर खंयच्यो तरतुदी आसात हाचे विशीं सविस्तर प्रक्रिया प्रतिज्ञापत्रांत सविस्तर सांगपाक जाय अशें न्यायालयान निर्देश दिला.
रानां खात्यान बेगोबेग हतीक धरपाची परवानगी मागल्या तरी न्यायालयान रानां खात्याक प्रतिज्ञापत्र सादर करपाक 14 नोव्हेंबर मेरेन वेळ दिला. हाका लागून 14 नोव्हेंबर मेरेन ओंकाराक धरपाच्या रानां खात्यान केल्ल्या येवजणेचेर तात्पुरतें आडमेळीं आयल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
