भांगरभूंय | प्रतिनिधी
विजय सरदेसाय : केंद्र, राज्य सरकार दिशाभूल करता
भांगरभूंय । प्रतिनिधी
पणजी : गोंयांतल्या मांडवी, जुवारी, शापोरा न्हंयां सयत कुमारजुवें व्हाळाचें पात्र वाडोवपा संबंदांत केंद्र सरकारा वतीन जारी केल्ल्या सविस्तर प्रकल्प अहवालाक (डीपीआर) गोवा फॉरवर्डाचो विरोध आसा, अशें पक्षाचे अध्यक्ष तशेंच आमदार विजय सरदेसाय हांणी आयतारा पणजे घेतिल्ले पत्रकार परिशदेंत स्पश्ट केलें.
केंद्र सरकारान गोंयांतल्या मांडवी, जुवारी, शापोरा न्हंयां सयत कुमारजुवें व्हाळाचें पात्र वाडोवपाच्या कामा खातीर 310 कोटींचो ‘डीपीआर’ तयार केला. दरवर्सा पावसाळ्यांत गोंयांतल्या खूबश्या गांवांनी हुंवार येता. पावसाचें उदक सांचून उरता. अशे स्थितींत केंद्रान तयार केल्ल्या ‘डीपीआर’ प्रमाण कामां सुरू जालीं जाल्यार ताचो व्हड मार थळाव्या लोकांक, नुस्तेमारांक आनी बार्ज धनयांक बसतलो. ताका लागून ह्या ‘डीपीआरा’क गोवा फॉरवर्डान विरोध केला, अशें आमदार सरदेसाय हांणी सांगलें.
केंद्र सरकारान हो ‘डीपीआर’ फक्त गोंयांतल्यान कोळसो येरादारीक अदीक चालना दिवचे खातीर केला. हे संबंदांत गोंयकारांची गोंय सरकारा कडल्यान दिशाभूल चल्ल्या. ताका लागून थळाव्या लोकांनी लेगीत ह्या डीपीआर’ आड उबे रावचे, असो उलो सरदेसाय हांणी मारला.
‘गोंयकारांक जाय गोंयकारवादी सरकार’
फाटले लोकसभा वेंचणुकेंत भाजपाक धडो शिकोवचे खातीर विरोधी पक्षांनी एकठांय येवचें, अशी गोंयकारांची इत्सा आसली. ते प्रमाण सगळे विरोधक एकठांय आयले. ताचो दक्षीण गोंयांत फायदो लेगीत जालो. सध्या गोंयकार भाजप सरकाराचेर पुराय बेजार आसात. येता ते विधानसभा वेंचणुकेंत गोंयकारांक पर्याय जाय. हो पर्याय राष्ट्रीय काय प्रादेशीक हाचो निर्णय गोंयकार फुडल्या वर्सभरांत घेतले, पूण गोंयकारांक गोंयकारवादी सरकार जाय, अशेंय विजय सरदेसया हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
