भांगरभूंय | प्रतिनिधी
दुर्घटना, अपघात हे नकळटां जातात. चूकय चुकून जाता. तिडकीन मनीस कितेंय करपाक शकता…. हें सगलें खरें आसलें तरी प्रत्येकान तारतम्य बाळगुपाक जाय, स्वताचेर नियंत्रण दवरपाक जाय, कसलेंय पावल उखलतना धा फावटीं विचार करपाक जाय. शितिदान पावल घाल, अशें जाण्ट्यांनीच सांगलांच. कारण एकदां पांय निसरलो काय तो घसरत वता…. आनी तरीय सावरलो ना जाल्यार मागीर सत्यनाश थारिल्लो!!
पावसाच्या दिसांनी दर आयतारा, सुटयेच्या दिसा तरणाट्या चले- चलयांचीं भिरीं घसघशे, न्हंयांचेर न्हावपाक वतात. हाची सुरवात जाल्या. हालींच्या वर्सांनी तर ती फॅशनूच जाल्या. पूण, थंय फकांडां, मस्ती करपाच्या नादांत आपलो जीवूय वचूं येता, हाचें भान कोणाकूच नासता. पयर सत्तरींत पावसान पयलो बळी घेतलो. शिवकुमार हो तरणाटो आपल्या बुडपी इश्टाक वाटावपाक गेलो आनी ताका बाबड्याक स्वताचो जीव वगडावचो पडलो. 19 वर्सांचो भुरगो तो. ताच्या वांगडच्या इश्टांक आतां हें दुख्ख, वेदना जीणभर सोंसच्यो पडटल्यो. शिवकुमाराच्या घरच्यांकूय मानसीक त्रास जातलेच. हे दुर्घटने पसून गोंयचे पावसमोगी तरणाटे बोध घेतले, अशी आस्त बाळगुया.
‘घसघसो पर्यटन’ तशें वायट न्हय. खंयूय न्हांवपाक गेले, नाचले, खेळ्ळे, परंपरे प्रमाण चिकन, गोबी मंच्युरियन खालें, मोबायलाचेर फोटो, व्हिडियो काडून सोशल मिडियाचेर घाले….हाका कोण हरकत घेवचो ना. थंड उदकांत, पावसांत भलायकी इबाडली ना, तर दुदांत साकर. पूण ह्या पिकनीकांनी नेमकें कितें जाता, कोण तें करता, हें थंय वचपी तरणाट्यांक बेसबरें खबर आसा. आतां कुटुंबांक घेवन थंय वचपाची माणसुकी ना. कोणाक हडकुपाक गेलो तर केन्ना तो तुमच्या आंगार धांवून येत, तें सांगपाक येना. ह्या पावसाळी पर्यटनांच्या थळांचेर सोऱ्याच्यो, खास करून बियरीच्यो बाटल्यो जळामळा पडिल्ल्यो दिसतात. थोडे तवनास त्यो फोडून उडयतात. मागीर उदकांत कवची दिसूंक ना जाल्यार रक्तबंबाळ जावपाची भिरांत. दिसपट्टो तणाव उणो जावचो म्हूण दुसऱ्या जाग्यांचेर वचपाचें आसता. सोरो वा आनीक कितें घेवन तर्र जाले काय मागीर कांय जाण अनवळख्याची कळ काडटात. उपरांत मारामारी. तातूंत ‘बळी तो कान पिळी’, हें वेगळें सांगपाक नाका. थळाव्या लोकांक पर्यटनथळां बंद करचीं पडल्यांत, हाचे वयल्यान वाचकांनी कितें तें समजूचें. बेबद्यांच्या उपद्रवाक लागून सत्तरींतल्या लोकांक भायल्यान येवपी गोंयकार पर्यटकांचेर बंदी घालची पडल्या. हालींच दिवचल तालुक्यांत लाडफेंच्या घसघश्याचेर कोणाकूच पावल दवरपाक दिवचे नात, अशें थळाव्या देवस्थानान सांगलां. तशें पळोवंक गेल्यार गांवांत पर्यटक येत जाल्यार ते चार पयशे मोडटात. गांवकारांक तांचे पसून फायदोच जाता. मात, कांय गांवकार आतां गांवांत पर्यटकूच नाकात म्हणटात, हाचे वयल्यान पावसाळी पर्यटनथळां वयलीं धुमशेणां, सांवाराची फक्त कल्पना करची.
सत्तरींत पोरूं आठ तरणाट्यांक बुडून मरण आयिल्लें. सोरो पियेवन मस्ती करप्यांक लागून हें घडटा, अशें त्या- त्या गांवांतले लोक उक्तेपणी सांगतात. म्होंवाचो गुणो नांवाची न्हंय आसा. थंय तर कितलेशेच लोक बुडून मेल्यात. सगल्यांक हें खबर आसा, तरीय थंयच मस्तेपणां जातात. तरणाटे फोंडांत पडटात आनी घरच्यांकूय त्रासांत घालतात. पोरूं एकल्यान म्होंवाच्या माल्याचेर गुंडो मारिल्लो. मागीर म्होंवा मुसांनी कांय लोकांक प्रसाद दिल्लो. पर्यटकांची ही मस्ती अशीच चालू उरली जाल्यार गोंयांतल्या चड लोकप्रीय नाशिल्ल्या ह्या आडवाटेच्या थळांचेर जावपी केस्तांवां वाडटलीं. तीं बंद जाल्यार गोंयची डझनभर सैमसोबीत थळां उरल्यांत, तींय पोरकीं जातलीं. तेन्ना तरणाट्यांनी कानांत वारें भरचें ना, हाची खबरदारी घेवची. तें पर्यटन थळाक बरेंच, पूण तांकांय चड बरें.
ह्या घसघशे, न्हंयो, व्हाळां वयल्या मस्तेक ‘बांद’ घालपाक जाय. थंय पुलीस बंदोबस्त दवरचो, अशी सगल्यांचीच मागणी आसा. तातूंच चुकीचें कांय ना. सरकारा कडेन पुलीस नात जाल्यार तांचो आंकडो वाडोवचो. मस्ती करप्याक एकदां शिटकावणी दिवची. आयकना जाल्यार ताब्यांत घेवचो. धोक्याच्या थळांचेर जीवरक्षकूय दवरूं येतात. ह्या थळांचेर सुविधाय आसच्यो. निदान कपडे बदलपाची तरी. कोण जखमी जालो जाल्यार ताचेर मुळावे उपचार करपाक वखदांचीय तजवीज करची. नामनेची हीं पर्यटन थळां बदनाम
जावचीं न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
