भांगरभूंय | प्रतिनिधी
विजय सरदेसाय हांणी दिली न्हंयांचो सांबाळ विधेयकाची नोटीस
पणजी : न्हंयांचो सांबाळ आनी प्रदुशण आडावपा खातीर गोवा फॉरवर्डचे आमदार विजय सरदेसाय हे अधिवेशनांत गोंयच्या न्हंयांचो सांबाळ आनी संरक्षण विधेयक २०२६ विधानसभेंत सादर करतले. हें विधेयक दाखल करपाची नोटीस तांणी विधीमंडळाक दिल्या. न्हंयांचे सुरक्षे खातीर खास प्राधिकरण स्थापन करपा वांगडाच प्रदुशण करप्यांचेर दंडात्मक कारवायेची तरतूद ह्या विधेयकांत आसा.
न्हंयांचें आयज व्हडा प्रमाणांत प्रदुशण जाता. ताका आळाबंद घालपा वांगडाच राखपाचीय गरज आसा. ह्याच हेतान हें विधेयक मांडपाची नोटीस सादर केल्ल्याची म्हायती आमदार सरदेसाय हांणी दिली. न्हंयांचें संरक्षण करपा खातीर खास प्राधिकरण स्थापन करपाची तरतूद आसा.
मजगतीं, आरजीचे आमदार विरेश बोरकार हेय गोंयच्या न्हंयांचें संरक्षण आनी वेवस्थापन विधेयक २०२६ विधानसभेंत मांडटले. उदकाच्या स्रोतांचो सांबाळ करपा वांगडाच ताचें योग्य तरेन वेवस्थापन जावपाक जाय. गोंयच्या संरक्षणा खातीर आरजी पक्ष लढो दिता. न्हंयो तशेंच उदकाच्यो स्रोतांचो सांबाळ हो हाचोच भाग आशिल्ल्याची म्हायती आमदार बोरकार हांणी दिली.
गोवा फॉरवर्डचे सरदेसाय आनी आरजीचे बोरकार ह्या दोगांयचीं विधेयकां स्वतंत्र आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
