भांगरभूंय | प्रतिनिधी
भांगरभूंय । प्रतिनिधी
पेडणेः न्हंयबाग- पेडणे हांगा रेल्वे पुला लागी एके बायलेचे तकली नाशिल्ले कुडीचे दोन कुडके मेळ्ळे. खून केल्या उपरांत तिचे दोन कुडके करून ते हे सुवातेर हाडून वययले आसुए असो दुबाव पेडणे पुलिसांनी उक्तायला. खून केल्ली बायल सुमार 30 तें 35 वर्सां पिरायेची आसा.
रेल्वे पुला कडल्या झोपांत हे कुडीचे कुडके मेळ्ळे. छाती आनी पांय असे हे कुडके आसात. ते मेळ्ळे उपरांत न्हंयबाग वाठारांत खवदळ जालो. फाटल्या शेनवाराक सांजे पेडणे पुलिसांक खबर दिल्या उपरांत तांणी घडणुकेचे सुवातेर येवंन पळोवणी केली. स्थलांतरीत कामगारांनी कुडीचे कुडके पळय़ले. ते कुसल्ले अवस्थेंत आशिल्ले. बायलेचो दोन दिसां पयली खून करून कुडीचे दोन कुडके करून ते न्हंयबाक रेल्वे पुला लागी हाडून उडयल्यात अशें पेडण्याचो पुलीस निरीक्षक निनाद देऊलकारान सांगलें.
पुलिसांनी पंचनामो केलो. पेडणे पुलीस गोंयांतल्यान वा महाराष्ट्रांतल्या सिंधुदुर्ग तालुक्यांतल्या बायल बेपत्ता जाल्ल्याची कागाळ नोंद जाल्या काय कितें हाची म्हायती मेळयतात. पुलीस उपअधिक्षक सागर एकोस्कार आनी वरिश्ठ पुलीस अधिकाऱ्यांनी घडणुकेचे सुवातेची पळोवणी केली. पुलिसांनी तकली खंय मेळटा काय हाचो सोद घेतलो. मात तांच्या हातांत कांय लागलें ना. बायलेची तकली मेळ्ळ्या उपरांत ती कोण हें उक्ताडार येवपाक शकतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
