भांगरभूंय | प्रतिनिधी
मडगांव नगरपालिकेक केलें निवेदन सादर
मडगांव: मडगांव मार्केटांतल्या विक्रेत्यांनी मार्केटा भायर बेकायदेशीर रितीन करतल्या विक्री आड पालिकेक निवेदन सादर केलें. मुख्याधिकारी मधू नार्वेंकार हांणी कारवायेचें आस्वासन दिलां. उपरांत दनपारां पालिकेन सडेकार लेनींत दुकाना भायर दवरिल्लें साहित्य जप्त केलें.
मडगांव नगरपालिकेच्या न्यू मार्केट बाजारपेठेंतल्या विक्रेत्यांच्या शिश्टमंडळान सोमारा मुख्य अधिकारी मधू नार्वेंकार हांची भेट घेतली. तांकां निवेदन सादर करून रस्त्याचे कुशीक आनी बाजार वाठारांत बेकायदो विक्रेत्यांच्या वाडट्या उपस्थिती विशीं हुस्को उक्तायलो.
भोंवत्या विक्रेत्यां सयत दुकानदारां कडल्यान दुकाना भायर वेपार करीत आशिल्ल्याचो मुद्दो उपस्थीत केलो. ह्या अतिक्रमणांक लागून मार्केटांतल्या दुकानाच्या वेवसायाचेर गंभीर परिणाम जायत आसा. नगरपालिका फक्त तोंडी आस्वासन दीत आशिल्ल्याचो आरोप कांय जाणांनी केलो.
भोंवते विक्रेते बेकायदेशीरपणान बाजारपेठेची सुवात व्यापून उडयल्या. मुखेल अधिकारी नार्वेंकार हांणी तांच्यो कागाळी आयकल्यो आनी हे समस्येचे निराकरण करपा खातीर रोखडीच कारवाय करतले अशें शिश्टमंडळाक आस्वासन दिलें. उपरांत दनपारां पालिका कर्मचाऱ्यांनी सडेकार लेनींतल्या अतिक्रमणाचेर कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
