न्यू नॉर्मल! एक योग्य पर्याय

भांगरभूंय | प्रतिनिधी

तशें पळोवंक गेल्यार न्यू नॉर्मल आमकां नवें न्हय कांय वर्सां फाटीं जेन्ना कोवीड धामीन मनीसजातीक धारेर धरिल्लो तेन्ना आमकां सगल्यांकच ‘न्यू नॉर्मल’ आपणावंचें पडिल्लें.

ह्या ना त्या कारणांक लागून ल्हान व्हड मनशां कडल्यान चुको जायत आसतात. वायट गजाल न्हय पूण ते चुकीतल्यान मनशान आपले भितर सुदारणा घडोवन हाडूंक जाय. अश्यो चुको फुडाराक परतून जावच्यो न्हय म्हूण सादुरताय बाळगूंक जाय. म्हजी आवय म्हणटाली चार पांयांचें जनावर चुकता थंय मनीस चुकल्यार कोणाचेर मळब कोसळपाचें ना. त्या मनशाक मात आपली चूक सुदरचे खातीर एक संद अवश्य दिवची पडटली. ना तर त्या मनशाचेर अन्याय जावं येता. हें जरी खरें तरी हालींसराक कांय मनशांची वागणूक पळयत जाल्यार तांणी चुकी करचे खातीरच जल्म घेतला अशें दिसून येतलें. ही गजाल आमच्या देशांतच घडटा अशें न्हय पुराय संवसारार चड कमी प्रमाणांत अशीच परिस्थिती दिसून येता.
आयचे फुडारी लेगीत बेजापसालदार कशे वागतात. तांकां आपल्या सुवार्था मुखार सरभोंवतणचें मात्तूय सोयरसुतक आसना. फुडारपण मेळोवचे खातीर हे लोक कितेंय करूंक तयार आसतात. आमच्या देशाचे बाबतींत विचार केलो जाल्यार स्वातंत्र्य मेळत सावन देशांत साबार मळार जी उदरगत घडोवन हाडल्या ती कोणाच्याय दोळ्यांत भरपा सारकीच. तो मागीर आपलो मनीस आसूं वा परकी आसूं. देशी आसूं वा विदेशी आसूं. अशा मनशांचो सभावच तसो हेरांक पिडपाचो, दुसऱ्यांचो दुस्वास करपाचो. घडये हाकाच लागून कांय देश आमकां आशिर्वाद दिवंक एक हात उबारतात तर दुसऱ्या हातान फाटीर धुमके घालतात.
हाचो सोंपो अर्थ असो, आमची आनीक आमच्या देशाची नसाय करपी ह्या संवसारांत उणे नात. आमच्या देशाक फाटीं ओडूंक आनी आमच्या लोकांक भडकावन घालूंक तशेच आमचे मदीं अशांती पातळावपा खातीर हे लोक लिपचोरयां कसलीं ना कसलीं कारस्थानां करीत रावतात. आमच्या देशाचो शेजारी पाकिस्तान ‘Bleed India with a thousand cuts.’ असो म्हणपी, हो लश्करी सिघ्दांत वापरून भारतीयांक पिडपाचो उपद्रव फाटलीं सत्तरा वयर वर्सां करीत आयला. आतां हाचे मुखार तो अशे तरेचे उपद्रव करूंक शकचो ना अशें मानपय चुकीचें थारूं येता. भरतीय सैन्यान ऑपरेशन सिंदूर चालीक लावन तांचो कांटो काडिल्लो आसा. नव्या भारताची कुवत कितें ती तांकां दाखोवन दिल्ली आसा. तरी लेगीत तसो प्रयत्न तो परत करत तर तांचे सारको मूर्ख ह्या संवसारंत आनीक कोण ना अशेंच म्हणचें पडटले.
ते भायर प्रधानमंत्री नरेंद्र मोदीन भारताचें न्यू नॉर्मल कितें आसतलें हें पुराय संवसाराक कळीत करून पाकिस्तानाकय चत्राय दिल्या. हाचे मुखार मात कसलोय कांड करची येवजण आंखचे पयली ताका चार फावटी विचार करचो पडटलो. कारण ऑपरेशन सिंदूर अजून थांबूक ना तें ऑपरेशन जेन्ना जाप दितलें तेन्ना ताचो परिणाम कितें जावं येता हाची कल्पना पाकिस्तानाक बेस बरी आयल्या आसतलीच. ही गजाल तांणे खंयचेच परिस्थितींत विसरूंक फावना. आतंकवादी हमलो घडोवन हाडप्यांक पोसपाचें सोडून आपलो देश आनी थंयचे नागरीक कशे वयर सरतले हाचेर आपली शक्त खर्च करीत जाल्यार पाकिस्तान आपल्याक सावरूंक शकतलो. नाजाल्यार रसातळाक वचूंक ताका कळाव लागचो ना. थंयच्या लश्कर मुखेल्यांक आनीक राज्यकर्त्यांक येत व्हय बरी बुद्द! हें येतलो काळच दाखोवन दितलो. तो मेरेन आमी उदरगतीचें एक एक पावल मारीत मुखार वचत रावया.
तशें पळोवंक गेल्यार न्यू नॉर्मल आमकां नवें न्हय कांय वर्सां फाटीं जेन्ना कोवीड धामीन मनीसजातीक धारेर धरिल्लो तेन्ना आमकां सगल्यांकच ‘न्यू नॉर्मल’ आपणावंचें पडिल्लें. जस जसो वेळ पासार जायत गेलो मनीस त्या संकश्टांतल्यान भायर सरूंक पावलो. ल्हवू ल्हवू जीण जाग्यार पडूंक लागिल्ली खरी, पूण आमची काम करपाची आनी भुरग्यांची शिकपाची पद्दत त्या वेळार सामकी बदलून गेल्ली. मनशान आपणायिल्लो तो बदल आजून मेरेन तसोच चालू आसा. आतां जस जसो काळ बदलत वतलो न्यू नॉर्मल आपणावचें पडटलें तांतूंत आतां कसलीच नविदाद उरची ना.
2008 वर्सा संवसारार पातळिल्ल्या बिकट अर्थीक परिस्थितीक लागून न्यू नॉर्मल ही संकल्पना आमी पयले फारा आयकल्लें. त्या वेळार साबार देशांची विस्कटिल्ले अर्थीक स्थितीक लागून मनशां मदीं समाजीक अशांतता निर्माण जाल्ली. ते वायट परिस्थितीक लागून अर्थशास्त्रज्ञ्यांक मनीस जिणेचेर वायट परिणाम जाल्लो दिसून आयिल्लो. याद करात आमचे जिणेच्या वेगळ्या वेगळ्या पांवड्यार पावतकच आमकां न्यू नॉर्मल आपणावंचें पडटालें काय ना. कांय देखी सहज दिवं येता.
मनीस जेन्ना लग्नाची गांठ मारूंक सव्यार उबो रावता तेन्ना तो नवें जिवीत सुरू करचे खातीर न्यू नॉर्मल आपणावंक तयार आसतातच न्हय. तेच परी लग्न जावन घोवा घरा वचपी चली लोगीत न्यू नॉर्मल आपणावन घोवा घरच्या मनशांक ओड लायता, आपलेंपण दिता. मुखार जेन्ना तिका आवयपण फावो जाता तेन्ना तिचे परत एक फावट न्यू नॉर्मल सुरू जाता. त्या वेळार लेगीत ती रातीचे दीस करून आपल्या भुरग्याक ल्हानाचो व्हड करूंक वावुरता. हाचे वेल्यान कोणय मानूंक शकतलो न्यू नॉर्मल हो आमचे जिणेचो एक भाग कसो जावन आसा.
खंयचेय परिस्थितीक तोंड दितले जाल्यार फावो तो बदल आमकां करचोच पडटलो. अशें केल्ल्यानच आमी जीण सुखी करूंक पावतले. मनीसजातीचेर जेन्ना जेन्ना म्हूण सैमीक आपत्ती आयल्या त्या त्या वेळार मनशान न्यू नॉर्मल आपणावन तातूंतल्यान आपली सुटका करून घेतिल्ली आमी पळयल्या. न्यू नॉर्मल नांवाचो एक कोरियन सिनेमाय आयिल्लो जातूंत एकमुळी जीण कितली भिरांकूळ आसूं येता हाचें चित्रण पळोवंक मेळटा. मनशाचो भंय आनी ताचे जिणेंत येवपी अनपेक्षीत घात हांचेंय बारीकसाणेन केल्लें चित्रण सिनेमांत पळोवन आंगार कांटो आयले बगर रावना.
मनीसजातीचेर जेन्ना कसलोय कठीण प्रसंग येता त्या कठीण वेळार आपलो जीव सालवार करप हें खूब म्हत्वाचें. तेच बराबर त्या संकश्टा वेळार आमचे भितर फावो तो बदल घडोवन हाडूंक आमकां जमपाक जाय. कारण ह्याच वेळार आमचे समाजीक जिणेचेर बरो वायट परिणाम जावंक पावता. देखून ही वायट परिस्थिती जाग्यार घालप गरजेची थारता आनी ती जाग्यार घालूंक न्यू नॉर्मल आपणावंचें पडटा.

एच. मनोज
9822441417