न्यूझीलंडांत चड खाण घाल्ल्यान सुण्याक मरण, बायलेक 2 म्हयन्याची बंदखण
भांगरभूंय | प्रतिनिधी
ऑकलंड, खबरां संस्था ः न्यूझीलंडांत एका बायलेक 2 म्हयने बंदखणीची ख्यास्त फर्मायल्या. ही बायल आपल्या पाळीव सुण्याक चड खाण घालताली. चड खाल्ल्यान सुण्याचें वजन वाडिल्लें आनी ताका मरण आयलें.
न्यूजवीकाच्या अहवाला प्रमाण ऑकलंडातल्या एका बायलेच्या घरांत पुलिसांक नुगी नांवाचो हो सुणो मेळ्ळो. नुगी थंय जायत्या सुण्यां वांगडा रावतालो. पूण वजन चड आशिल्ल्यान तो हेरां परस वेगळो दिसतालो. नुगीचे वजन 54 किलो आशिल्ल्यान तो खूब कश्टान चलतालो. ताची स्थिती पळोवन पुलिसांनी नुगीक थंयच्यान हाडून एसपीसीए हे जनावरांची जतनाय घेवपी संघटनेच्या ताब्यांत दिलो. एसपीसीएंत रावलें उपरांत फकत 2 म्हयन्यांत ताचें वजन सुमार 9 किलो उणें जाल्लें. पूण उपरांत अचकीत ताका मरण आयलें.
नुगीच्या पोस्टमार्टमांत ताका यकृतांतल्यान रगतस्त्राव जाल्ल्यान मरण आयिल्ल्याचें संघटनेन सांगलें. हाचेभायर ताका हेर जायती दुयेंसां आशिल्लीं जीं चड वजनाक लागून जाल्लीं. एसपीसीएच्या अहवाला प्रमाण नुगीक दर दिसा सुकीं फळां आनी 10 कुडके चिकनाचे खाण दिताली.
ह्या प्रकरणात ऑकलंड न्यायालयान हे बायलेक 2 म्हयन्यांची ख्यास्त फर्मायल्या. ते भायर तिका 1,222 न्यूझीलंड डॉलर (60 हजार रुपया) भरपाय दिवपाचो आदेश दिला. हाचे भायर तिका एक वर्स सुणीं पोसपाचेरूय बंदी घाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
