भांगरभूंय | प्रतिनिधी
ऑकलंड, खबरां संस्था ः न्यूझिलॅण्डांत २००८ वर्सा उपरांत जल्मल्ल्या नागरीकांक सिगार, तंबाखू विकत घेवपाक बंदी आसा. नव्या सरकारान ती बंदी काडपाचो निर्णय घेतला. ताका लागून लोकांक टॅक्सांत सवलत मेळटली, असो दावो सरकारान केला.
डिसेंबर २०२२ वर्सा न्यूझीलंड संसदेंत तंबाखू आनी सिगारेट हांचेर बंदी घालपी स्मोक फ्री पर्यावरण कायदो मंजूर केलो. ह्या खाला 2008 वर्सा उपरांत जल्मल्ल्या लोकांक कसल्याच प्रकारचीं धूम्रपानाचीं उत्पादनां विकतीं घेवंक मेळनात.
न्यूझीलंडाच्या दोतोर असोसिएशन आनी भलायकी तज्ञांनी सरकाराच्या निर्णयाचेर टिका केल्या. ओटागो युनिव्हर्सिटीचो प्राध्यापक रिचर्ड एडवर्डसान म्हणलें, आमी निराश जाल्यात. हें पावल देशाक फाटीं व्हरपा सारके आसा. ह्या कायद्याचो न्यूझीलंड अर्थवेवस्थेक अब्जांनी रुपया फायदो जातलो आशिल्लो.
न्यूझीलंड सरकाराक देशांक सिगारेट आनी तंबाखू पसून मुक्त करपाचे आसले, देखून हो कायदो केलो. न्यूझीलंडाची तेन्नाची भलायकी मंत्री आयशा वेरॉल हिणें संसदेंत हें विधेयक मांडलें.
सगळ्यांत उण्या प्रमाणांत धूम्रपान करपी देश न्यूझीलंड. सरकारी आंकडेवारी प्रमाण थंयचे फकत 8 टक्के लोक दर दिसा धूम्रपान करतात. फाटल्या वर्सा हो आंकडो 9.4 टक्के आशिल्लो. स्मोक फ्री पर्यावरण विधेयक मंजूर जाल्ल्यान धूम्रपान करप्यांचो आंकडो 5 टक्क्यांनी उणो जातलो आनी ल्हवू ल्हवू दर वर्सा तंबाखू विकतें घेवपी लोकांचो आंकडो उणो जातलो अशी अपेक्षा आशिल्ली.
भारतांत 18 वर्सां सकयल्या कोणाकूय तंबाखू विकपाक बंदी
भारतांत सिगारेट आनी हेर तंबाखूच्या उत्पादनांची विक्री आनी सेवना विशीं 2003 वर्सा कायदो केल्लो. ह्या कायद्याक सिगरेट आनी हेर तंबाखू उत्पादन कायदो अशें नांव आसा, जाका COTPA अशेंय म्हण्टात. ह्या कायद्या खाला भौशीक सुवातेर धूम्रपान करप, तंबाखूच्या उत्पादनांची जायरात करप, 18 वर्सां सकयल्या भुरग्यांक तंबाखूच्या उत्पादनांची विक्री करप, शिक्षणीक संस्थां भोंवतणी 100 यार्डां मेरेन तंबाखूच्या उत्पादनांची विक्री करपाचेर बंदी अशें नेम आसले.
एक अदमासा प्रमाण भारतांतले 35% तंबाखू वापरपी लोक 18 वर्सां सकयल आसात. ७०% लोक २१ वर्सां पिराये उपरांत तंबाखू वापरपाक लागतात. हाचो अर्थ सद्याचे कायदे प्रभावी नात. देखून ह्या कायद्यांत दुरुस्ती करपा खातीर सरकारान नवो मसुदो तयार केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
