भांगरभूंय | प्रतिनिधी
कांय पत्रकारांक घेतले ताब्यांत
नवी दिल्ली, खबरां संस्था: दिल्ली पुलिसांनी ‘न्यूजक्लिक’ ह्या ऑनलायन पोर्टलाच्या कार्यालयांचेर धाड घालून कांय पत्रकारांक ताब्यांत घेतले.
भारतांत चिनाच्या प्रचारा खातीर अमेरिकन अब्जाधीश नेव्हिल रॉय सिंघम हाचे कडल्यान निधी घेतिल्ल्याचो आरोप करून दिल्ली पुलिसांच्या खाशेल्या पंगडान आयज ‘न्यूजक्लिक’ च्या पत्रकारांच्या कार्यालयांचेर आनी घरांचेर धाड घाली. वट्ट ३० परस चड सुवातेर धाड घालून कांय पत्रकारांक ताब्यांत घेतल्यात.
अंमलबजावणी संचालनालयान (ED) ह्यान पयलीं फंडींगच्या प्रकरणांत न्यूजक्लिकच्या कार्यालयांत धाड घालून निधीच्या स्रोतां विशीं चवकशी केल्ली. ते चवकशेंतल्यान मेळिल्ले म्हायतीच्या आदारान पुलिसांनी आयज छापे घालून नवो गुन्यांव दाखल केला.
मेळिल्ले म्हायती प्रमाण, पुलिसांनी कांय पत्रकारांचे लॅपटॉप, मोबायल फोन आनी हार्ड डिस्कांतल्यान डंप डेटा सयत हेर कांय इलेक्ट्रॉनीक पुरावे जप्त केल्यात. अभिसार शर्मा आनी उर्मिलेश ह्या पत्रकारांक पुलिसांनी ताब्यांत घेतल्यात. अजून कोणाक अटक जावंक ना.
१७ ऑगस्टाक दिल्ली पुलिसांनी न्यूजक्लिकाचेर युएपीए आनी हेर कलमा खाला केस नोंद केल्ली. दोन समाजां मदीं फूट घालप आनी गुन्यांवकारी कट रचपाचो आरोप न्यूजक्लिकाचेर दवरिल्लो. आतां ताचे खाला कारवाय जाल्या अशें पुलीस सुत्रांनी सांगलें.
प्रेस क्लबान हुस्को उक्तायलो
‘न्यूजक्लिक’ संबंदीत पत्रकार आनी लेखकांच्या घरांनी जाल्ली कारवाय हुस्को करपा सारकी आसा. हाचेर आमी बारीक नदर दवरतात अशें प्रेस क्लब ऑफ इंडियान सांगलां. प्रेस क्लबान पत्रकारांक आपलो तेंको उक्तायला आनी सरकारान ह्या प्रकरणांत पुराय म्हायती दिवची अशी मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
