भांगरभूंय | प्रतिनिधी
न्युझिलॅण्ड पंगडान ऑस्ट्रेलियेंत चालू आशिल्ले संवसारीक टी-20 क्रिकेट सर्तीचे सेमी फायनलींत सुवात मेळयली. ताणें दुबळ्या आयर्लेण्डाक 35 धांवड्यांनी हारयलो. अंदूंचे संवसारीक टी-20 सर्तीचे सेमी फायनलींत सुवात मेळोवपी न्युझिलॅण्ड पयलो पंगड थारलो. तशेंच सर्तीच्या इतिहासांत ताणें तिसरे खेपे निमाण्या चारांनी सुवात मेळयली.
अॅडिलेडाच्या ओव्हल मैदानाचेर जाल्ले मॅचींत न्युझिलॅण्डान पयलीं बॅटींग करतना 185 धांवड्यांचो आव्हानात्मक स्कोर उबो केलो. मुखेली केन विलियम्सनान सगल्यांत चड 61 धांवड्यो केल्यो. आयर्लेण्डा वतीन जोशुआ लिटलान हॅट्रीक केली. मोखीचो फाटलाव करपी आयर्लेण्डाक 20 ओव्हरींनी 9 बाद 150चेर आडायलो. न्युझिलॅण्डा वतीन ल्योकी फर्ग्युसनान तीन, टीम सावथी, मिचेल सॅंटनर आनी इश सोधी हांणी दरेकी दोन विकेटी घेतल्यो.
न्युझिलॅण्डाच्या ह्या जैतान ग्रुप एकांतली दुसरी सुवात मेळोवपाक ऑस्ट्रेलिया आनी इंग्लंड ह्या पंगडां मदीं सर्त आसतली. ऑस्ट्रेलिया आनी इंग्लंड दोगांयनी आपआपली निमाणी मॅच जिखली आसली तरी जाची धांवगती सरस आसतली तो सेमी फायनली खातीर पात्र जातलो. ऑस्ट्रेलियेन आपले निमाणे मॅचींत अफगाणिस्ताना आड फक्त चार धांवड्यांनी निसट्टें जैत जोडलां. ताचे पांच मॅचींतल्यान सात गूण जाल्यात, ताची धांवगती -0.173 अशी आसा, जाल्यार तिसरे सुवातेर आशिल्ल्या इंग्लंडाची धांवगती +0.547 अशी आसा. पूण, ताची एक मॅच बाकी आसा. ताचे चार मॅचींतल्यान पांच गूण आसात. ऑस्ट्रेलियाची धांवगती डेंजर झोनांत आसा, ताका लागून इंग्लंड आपली निमाणी मॅच जिखलो जाल्यार तो थेट सेमी फायनलींत पावतलो आनी ऑस्ट्रेलियेचें आव्हान सोंपतलें.
मजगतीं, टॉस हारल्या उपरांत पयलीं बॅटींग करपी न्युझिलॅण्डान बरी सुरवात केली. ताच्या ओपनरांनी पयले विकेटी खातीर अर्द शेंकड्याची भागिदारी केली. पूण, फिन अॅलेन 32 धांवड्यो करून बाद जालो. ताच्या फाटोफाट डॅव्हॉन कॉन्वे (28) लेगीत तंबूंत परतलो. पूण, मुखेली केन विलियम्सान एक बाजू सांबाळून धरली. ताणें ताबडतोड बॅटींग करतना 35 बॉलांनी 61 धांवड्यो केल्यो.अखेरच्या ओव्हरींनी 31 धांवड्यांची खेळी करून आयर्लेण्डा मुखार व्हड मोख दवरली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
