भांगरभूंय | प्रतिनिधी
संवसारीक टी-20 क्रिकेट सर्तीच्या अ गटांतले मॅचींत न्युझिलॅण्डान श्रीलंका पंगडाक 65 धांवड्यांनी हारयलो. ह्या जैता सयत न्युझिलॅण्डान सुपर 12 फेरयेच्या अ गटांत पांच गुणां सयत आपली पयली सुवात आनीक घटमूट केली. दुसरे वटेन श्रीलंका निमाणे सुवातेर घसरलो.
न्युझिलॅण्डा वतीन ग्लॅन फिलिप्सान 104 धांवड्यांची खेळी केली. ताचेच खेळीक लागून न्युझिलॅण्डाक 167 धांवड्यां मेरेन मजल मारप शक्य जालें. प्रत्युत्तर दितना श्रीलंकेक हें आव्हान पेलूंक ना आनी ताचो डाव 19.2 ओव्हरींनी 102 धांवड्यांचेर सोंपलो.
न्युझिलॅण्डा वतीन ट्रॅण्ट बोल्टान चार जाल्यार मिचेल सॅंटनरान 2 विकेटी घेतल्यो. श्रीलंके वतीन दसून शनका (35) आनी भानुका राजपक्षा (34) हांकां दोट्टी आंकडो हुपपाक शक्य जालें.
मोखीचो फाटलाव करपाक मैदानांत देंवपी श्रीलंकेची स्थिती सामकी बिकट जाल्ली. ट्रॅण्ट बोल्ट आनी टीम सावथी हांणी तांची स्थिती 4 बाद 8 अशी करून सोडिल्ली. एका वेळार श्रीलंका उण्या धांवसंख्येचेर बाद जातलो अशें दिशिल्लें. पूण, भानुका राजपक्षे आनी मुखेली दसून शनका हांणी धिटायेन आनी संयमान बॅटींग करून पंगडाचो स्कोर शंबरा वयर व्हरपाक मजत केली.
ते पयलीं न्युझिलॅण्डान पयलीं बॅटींग करतना 20 ओव्हरींनी 7 बाद 167 धांवड्यो केल्यो. बाबत सुरवाती उपरांत ग्लॅन फिलिप्सान 64 बॉलांनी 104 धांवड्यांची खेळी केली. एका फाटल्यान एक बॅट्समन बाद जायत आसतना एकल्या ग्लॅन फिलिप्सान ताबडतोड बॅटींग करून पंगडाचो स्कोर 150 वयर पावयलो. ताका डॅरेल मिचेलान 22 आनी सॅंटनरान 11 धांवड्यांची खेळी करून बरी साथ दिली.
श्रीलंके वतीन कुशल रजिथान 2, जाल्यार हसरंगा, तिक्षाणा डिसिल्वा आनी लाहिरू कुमार हांणी एकेक विकेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
