भांगरभूंय | प्रतिनिधी
न्युझिलॅण्डान भारता आडचे तीन वन डे आनी टी-20 माळे खातीर आपलो पंगड जाहीर केलो. मुखेली केन विलियम्सन आदल्या प्रमाण न्युझिलॅण्डाचें फुडारपण करतलो. पूण, अणभवी ओपनर मार्टिन गप्तिल आनी दावखुरो फास्ट बॉलर ट्रॅण्ट बोल्ड हांकां सुवात दिवंक ना. न्युझिलॅण्डाचे निवड समितीन हालींसाराक मार्टिन गप्तिलाचे सुवातेर युवा बॅट्समन फिन अॅलनाक खेळोवपाचो निर्णय घेतला. अॅलनाचो परतून एकदा पंगडांत आस्पाव केला.
न्युझिलॅण्डान 19 नोव्हेंबरा सावन सुरू जावपी तीन मॅचींचे टी-20 माळे खातीर आनी वन डे माळे खातीर 13 वांगड्यांच्या पंगडाची निवड केल्या.
बोल्ट आनी गप्तिल हांकां वगळावपाचो निर्णय कठीण आशिल्लो. पूण, दोगांय खातीर आंतरराष्ट्रीय क्रिकेटींत परतून येवपाचीं दारां उक्तीं आसात अशें न्युझिलॅण्डाचो प्रशिक्षक गॅरी स्टेडान सांगलें.
ज्या खेळगड्यांची केंद्रीय वा देशांतर्गत कबलात आसा, तांकांच प्राधान्य दितले अशें बोल्टाक केंद्रीय कबलात न्हयकारल्ली त्या वेळार सांगिल्लें. बोल्टान ऑगस्टांत न्युझिलॅण्ड क्रिकेटीची कबलात न्हयकारिल्ली. बोल्टाचे प्रतिभाची आमकां जाणविकाय आसा. पूण, आमकां हेरांक संद आनी अणभव दिवपाचो आसा अशें गॅरीन सांगलें.
टी-20 पंगडः केन विलियम्सन (मुखेली), फिन अॅलन, मायकल ब्रॅसवेल, डेव्हॉन कॉन्वे, लॉकी फर्ग्युसन, डॅरिल मिशेल, अॅडम मिल्ने, जिमी नीशम, ग्लेन फिलिप्स, मिचेल सँटनर, ईश सोधी, टिम साउथी, ब्लॅर टिकनर.
वन डे पंगडः केन विलियम्सन, फिन अॅलन, मायकल ब्रॅसवेल, डेव्हॉन कॉन्वे, लॉकी फर्ग्युसन, मॅट हेन्री, टॉम लॅथम, डॅरिल मिशेल, अॅडम मिल्ने, जिमी नीशम, ग्लेन फिलिप्स, मिचेल सँटनर, टिम सावथी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
