न्युझिलॅण्डाचें सेगीत दुसरें जैत

भांगरभूंय | प्रतिनिधी

न्युझिलॅण्डान संवसारीक वन डे क्रिकेट सर्तींत सेगीत दुसऱ्या जैताची नोंद केली. हांगाच्या राजीव गांधी आंतरराष्ट्रीय स्टेडियमाचेर जाल्ले मॅचींत ताणें नॅदरलॅण्ड पंगडाक 99 धांवड्यांनी हारयलो. उक्तावणाचे मॅचींत न्युझिलॅण्डान सध्याचो वस्ताद इंग्लंडा आड व्हड जैत जोडिल्लें.

पयलीं बॅटींग करतना न्युझिलॅण्डान विल यंग, रचिन रविंद्र आनी टॉम लॅथम हांच्या अर्द शेंकड्यां नेटार 7 विकेटी वगडावन 322 धांवड्यांचो दोंगर उबारिल्लो. नॅदलॅण्डान मोखीचो बरे तरेन फाटलाव करपाक जमलो ना. ताच्यो थारावीक अंतरान विकेटी पडत गेल्यो. कॉलिन एकरमॅनान 69 धांवड्यांचें योगदान दिलें. न्युझिलॅण्डा वतीन मिशेल सॅण्टनरान पांच विकेटी घेतल्यो. नॅदरलॅण्डाक 46.3 ओव्हरींनी 223 धांवड्यो करप शक्य जाल्यो.

ते पयलीं यंग आनी रविंद्र हाणें दुसरे विकेटी खातीर 77 धांवड्यांची भागिदारी करून न्युझिलॅण्डाक बरें मुळावण घालून दिलें. यंग हाणें 80 बॉलांनी 70 जाल्यार रविंद्रान 51 बॉलांनी 51 धांवड्यो केल्यो. ते उपरांत मुखेली लॅथमान अखेरच्या ओव्हरींनी 46 बॉलांनी 53 धांवड्यांची खेळी करून पंगडाचो स्कोर 300च्या वयर पावयलो.

नॅदरलॅण्डान पयल्या तीन ओव्हरींनी एकूय धांवडी करपाक दिली ना. यंगान चवथे ओव्हरींत रेयान क्लेना आड दोन चवके मारून न्युझिलॅण्डाचें खातें उगडलें. डॅव्हॉन कॉन्वे (32) स्पिनर आर्यन दत्ताक सको मारलो. पूण, धांवगती वाडोवपाच्या यत्नांत कॉन्वे बाद जालो. ताका स्पिनर रोलोफ वान डेर मर्व्हान बाद केलो. अशे तरेन पयले विकेटी खातीर केल्ली 67 धांवड्यांची भागिदारी फुटली. इंग्लंडा आड शेंकडो मारपी रविंद्र आनी यंग हाणें डाव सांबाळ्ळो. न्युझिलॅण्डाचे बॅट्समन फॉर्मांत दिसले.

पूण, दोगूय अर्द शेंकडे पुर्ण केल्या उपरांत रोखडेच बाद जाले. पॉल वान मिकेरनान यंगाक बाद केलो, जाल्यार रविंद्राक वान डेर मर्वान बाद केलो. ते उपरांत लॅथम आनी डॅरिल मिशेल (47 बॉलांनी 48 धांवड्यो) हांणी चवथे विकेटी खातीर 53 धांवड्यांची भागिदारी करून धांवगती आनीक वाडयली.

लॅथम अर्द शेंकडो पुर्ण केल्या उपरांत दत्ताच्या बॉलाचेर बाद जालो. सॅण्टनरान 17 बॉलांनी नाबाद 36 धांवड्यांची खेळी केली. न्युझिलॅण्डान निमाण्या तीन ओव्हरींनी 50 धांवड्यो जोडल्यो.

मोखीचो फाटलाव करपी नॅदरलॅण्डाची सुरवात बरी जाली ना. विक्रमजीत सिंग (12) आनी मॅक्स (16) रोखडेच बाद जाले. ते उपरांत कोलिनान बास डी लिडे आनी तेजा हांच्या वांगडा मेळून स्कोर मुखार व्हेलो. पूण, उपरांत न्युझिलॅण्डाच्या बॉलरांनी आपलो शेक दवरलो. कॉलिनान 73 बॉलांनी 69 धांवड्यांचें आनी बास डी लिडेन 18 आनी तेजान 21 धांवड्यांचें योगदान दिलें. मदले फळयेंतलो बॅट्समन मुखेली स्कॉट एडवर्डान 27 बॉलांनी 30 आनी सायब्रॅण्डान 29 धांवड्यो केल्यो.