भांगरभूंय | प्रतिनिधी
न्युझिलॅण्डान संवसारीक वन डे क्रिकेट सर्तींत जैताची हॅट्रीक करून परतून गुणतकट्यांतली पयली सुवात मेळयली. चेन्नय जाल्ले मॅचींत ताणें बांगलादेशाक 8 विकेटींनी हारयलो.
बांगलादेशान टॉस हारल्या उपरांत पयलीं बॅटींग करतना 9 विकेटी वगडावन 245 धांवड्यो केल्यो. न्युझिलॅण्डान 42.5 ओव्हरींनी 2 विकेटी वगडावन 248 धांवड्यो करून जैत जोडलें.
दुखापतीक लागून पयल्या दोन मॅचींनी खेळूंक नाशिल्ल्या केन विलियम्सनान मुखेलीचे भुमिकेंत दिसलो. ताणें संयमी खेळ करतना 78 धांवड्यांची खेळी केली आनी डॅरील मिचेल (नाबाद 89) वांगडा शेंकड्याची भागिदारी करून जैत मेळोवन दिवपाक मोलादीक योगदान दिलें. पूण, दुखापतींतल्यान पुर्ण बरो जावपी विलियम्सन खेळटना परतून जखमी जालो आनी ताका रिटायर्ड हर्ट जावन मैदान सोडचें पडलें.
मजगतीं, सुरवातीच्यो चार रोखड्योच पडल्या उपरांत मुशफिकर रहीमान बांगलादेशाचो डाव सांबाळ्ळो. ताणें शाकिर अल हसना वांगडा मेळून 96 धांवड्यांची भागिदारी केली आनी आपलो अर्द शेंकडो लेगीत पुर्ण केलो. तो 66 धांवड्यो करून बोल्ड जालो. तो बाद जाल्ल्यान व्हड स्कोर उबारपाची बांगलादेशाची आस्त सोंपली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
