भांगरभूंय | प्रतिनिधी
न्या. भूषण गवई हांणी मागासवर्गियांनी क्रिमी लेअराच्या नेमाक पाळो दिवचो अशें केल्लें आवाहन तळागाळांतल्या मागासवर्गियांच्या विकासा खातीर फायद्याचें आसा.
सरकारी नोकऱ्यो, शिक्षणीक प्रवेश हातूंत आरक्षण हो विशय हालीं खूबसो संवेदनशील जायत आसतना हालींच निवृत्त जाल्ले सरन्यायाधीश भूषण गवई हांणी एक म्हत्वाचो मुद्दो मांडला. ताचे वेल्यान तांचेर आरक्षणाचो लाव घेवप्यांनी टिका लेगीत केली. न्या. गवई हांणी अशें आवाहन केलां की, आयज मेरेन आरक्षणाचो लाव घेवन जे आतां सुस्थापीत जाल्यात, जांची शिक्षणीक आनी अर्थीक स्थिती सुदारल्या, तांणी आतां त्या आरक्षणाचो फायदो अजूनय मागास उरिल्ल्यांक मेळचो, म्हूण स्वता जावन आपल्याक मेळपी लाव सोडून दिवंक जाय. सांगपाची गजाल म्हणल्यार जांची परिस्थिती आतां सुदारल्या तांणी आरक्षण घेवचें न्हय. न्या. भूषण गवई हांचें हें विधान धाडशी म्हणचें पडटलें. कारण सद्या आरक्षण मेळोवपा खातीर समाजांतल्या विवीध समाज घटकांची सर्त सुरू आसतना तें सोडून दिवपाचें आवाहन करप हें खरेंच धाडसाचें आसा. भूषण गवई हे स्वता मागास समाजांतल्यान येत आशिल्ल्यान तांणी अशें विधान करप म्हणल्यार स्वताच्या भावांचें ते लुकसाण करतात अशीच कांय जाणांनी तांचेर टिका केली. न्या. गवई हांणी सरन्यायाधीशपदाच्या उत्तरकाळांत क्रिमी लेअराचो मुद्दो मांडपाक सुरवात केली. क्रिमी लेअर म्हणल्यार जे मागाशिल्ले आरक्षणाच्या लावाक लागून सुस्थापीत जाल्यात असो वर्ग. तांणी आतां आरक्षण सोडून ताचेय पलतडी वचून जे मागास आसात तांचे मेरेन लाव पावोवपाचो यत्न करप गरजेचें आसा. न्या. गवई हांच्या ह्या आवाहना खातीर तांकां येवकारूच दिवपाक जाय.
डॉ. बाबासाहेब आंबेडकर हांणी राजघटनेंत जे जातीय आनी अर्थीक नदरेन मागास आसात, तांकां समाजाच्या मुखेल प्रवाहांत येवपाची संद मेळची म्हूण तांचे खातीर आरक्षणाची तरतूद केल्ली. पूण ही तरतूद विशिश्ट काळा खातीर आशिल्ली. एखादो मनीस आरक्षणाचो लाव घेवन सुस्थापीत जालो की ताका त्या आरक्षणाची गरज उरची ना, ताका लागून तें आरक्षण तो सोडून दितलो, उपरांत जांकां तें मेळ्ळें ना, तांकां तें मेळटलें अशें करून सगलो मागाशिल्लो वर्ग हो मुखेल प्रवाहांत येतलो. उपरांत आरक्षणाची गरज उरची ना अशें बाबासाहेबांक दिसतालें. पूण व्हड विचारवंतांनी समाजाचे व्यापक हीत दोळ्या मुखार दवरून मांडिल्लो विचार जेन्ना चालीक लावपा वेळार येता, तेन्ना ताचें स्वरूप इतलें बदलून वता की तो विचारवंत जितो आसत जाल्यार ताकाच ताचें अजाप दिसून हांवें कसलो विचार केल्लो आनी कितें जालें, हाचे वेल्यान ताचेर ओग्गी रावपाची वेळ येवची.
मार्क्सवादाचें बदलिल्लें स्वरूप पळोवन स्वता कार्ल मार्क्स हांणी म्हणिल्लें, हांव मार्क्सवादी न्हय. सद्या आरक्षणा वेल्यान विवीध समाज घटकां मदीं देशांतल्या विवीध राज्यांनी जी सर्त सुरू आसा ती पळयत जाल्यार डॉ. बाबासाहेब आंबेडकर हांकां कितें दिसपाचें, हाचो विचार केल्लो बरो. आरक्षण पेंवपाक शिकता आसतना पेंवपी उदकांत बुडचो न्हय, म्हणून ताचे फाटीक बांदिल्ल्या वाऱ्यान भरिल्ल्या बोमाड्या भशेन आसता. एकदां तो पेंवपाक शिकलो की उपरांत ताणें तो बोमाडो सोडून दिवंक जाय. कारण, सुरक्षीत दिसता म्हणून ताणें तो बोमाडो तसोच बांदून दवरीत जाल्यार तो ताच्या गतीन पेंवपा खातीर आडखळ थारता, हें तो बोमाडो बांदून दवरप्यान लक्षांत घेवंक जाय. पूण एखादी फायद्याची मेळिल्ली गजाल सोडप खूब कठीण आसता. न्या. भूषण गवई हांणी मागासवर्गियांनी क्रिमी लेअराच्या नेमाक पाळो दिवचो अशें केल्लें आवाहन तळागाळांतल्या मागासवर्गियांच्या विकासा खातीर फायद्याचें आसा. आपल्याक मेळिल्ल्या लावांतल्यान आपूण एकदां गिरेस्त जालो की, तो लाव आपले परस जे सकयल आसात तांचे मेरेन पावूंक दिनासतना तो आपले कडेन सांठोवन दवरप आनी आपली मक्तेदारी तयार करप हो मनीस सभाव आसता. ताका लागून सकयल्या लोकां मेरेन सुविधा पावनात. ताका लागून ते मागासूच उरतात.
ताका लागून जसो एके वटेन लावांक लागून नवो गिरेस्त वर्ग तयार जाता, जाल्यार दुसरे वटेन अतीगरीब वर्ग तयार जाता. म्हणल्यार मागाशिल्ल्यां मदीं विशमता तयार जाता. आतांय एक अशें निरिक्षण आसा की, आरक्षणाचो लाव घेवप्यां मदीं मागाशिल्ल्यांतल्या विशिश्ट जातीचे लोक मुखार आसात. हेर जाती खूब फाटीं आसात. म्हणल्यार लावांक लागून तयार जाल्लो नवो गिरेस्त वर्ग हेर मागासांक लावां पसून पयस दवरता.
सावरकर म्हणटाले, हिंदू धर्मांत दरेका खालच्या जाती खातीर वयली जात ही ब्राह्मण आसता. मागाशिल्ल्यां मदीं परतून जातींची उतरंड आसता. सावकारी, कामकरी अशे पोट प्रकार आसतात. ताका लागून तांचे मदींय भेदाभेद जायत आसता. भेदाभेद हो अमंगळ आसलो तरी ताचें अस्तित्व दिसून येत आसता. संतांकूय तो सोंपोवंक आयलो ना. ताका लागून त्या काळांतूय आंतरजातीय लग्नां जाल्लीं दिसून येनाशिल्लीं. सर्तींत फाटीं पडिल्ले आसात. तांणी मुखार येवन मुखेल प्रवाहांत वांटेकार जावपा खातीर आरक्षणाचें प्रयोजन आशिल्लें. पूण हालींच्या काळांत पळयत जाल्यार जे वयल्या जातींतले लोक आसात तांची आनीक सकयल वचपाची धडपड दिसून येता. तातूंतल्यान तांकां आरक्षण मेळोवपाचें आसा. मागाशिल्ल्यांक चड मागास जावन आरक्षणाचे अदीक लाव मेळोवपाचे आसात. अशा वेळार जे अतिमागास आसात तांचो वाली कोण, असो प्रस्न पडटा. तांकां जाल्यार आरक्षण म्हणल्यार नेमकें कितें आनी ताचे फायदे कशे मेळोवप हें लेगीत खबर नासता. तांणी कितें करचें? म्हणून न्या. भूषण गवई हांणी मांडिल्ल्या क्रिमी लेअराच्या नेमाचो संबंदितांनी प्रामाणीकपणान विचार करपाची गरज आसा. मागाशिल्ल्यांच्या व्यापक हिता खातीर न्या. गवई हांणी मांडिल्लो विचार येवकार दिवपीच आसा.
शिवाजी चौगुले
9867732504
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
