भांगरभूंय | प्रतिनिधी
मुख्यमंत्रीः आमदार फळदेसायान केली बांदकाम मोेडपाचे मागणी
भांगरभूंय I प्रतिनिधी
पणजी : पोरणें गोंयच्या बेकायदो बंगल्याचो प्रस्न न्यायालयांत आसा. न्यायालयाच्या आदेशा उपरांत कारवाय करप शक्य जातले. पोरणें गोंय इगर्ज वाठारांतल्या बेकायदाे बंगल्याचेर सभाघरांत चर्चा जाली.
पंचायत संचालनालया मुखार चार सुनावण्यो जाल्यात. आतां 21 जुलयाक सुनावणी जातली. न्यायालयाचो निर्णय सरकाराचेर बंधनकारक आसा, अशें मुख्यमंत्र्यांनी सांगलें. दायज थळाच्या एक कि.मि. वाठारांत सरकार बफर झोन मार्क करतले. एक कि.मि. वाठारांत बांदकाम करपाक मेळचें ना, अशें नगरनियोजन मंत्री विश्वजीत राणे हांणी सांगलें.
पोरणें गोंय इगर्ज वाठारांत बेकायदां बांदकाम आसा. पूण खटल्याची सुनावणी परत परत तहकूब कित्याक जाता? असो प्रस्न आमदार राजेश फळदेसाय हांणी केलो. हे बांदकाम बरेच पोरणें आसा. तशेंच हे प्रकरण न्यायालयांत आसा. न्यायालयाच्या आदेशा भायर कितेंच करपाक मेळना, अशें मंत्री विश्वजीत राणे हांणी सांगलें.
संंबंदितांनी राष्ट्रीय दायज थळ संंवर्धन संस्थे कडल्यान मान्यताय घेवन बांदकाम केलां. राज्य सरकारान हाका मान्यताय दिवंक ना. पोरणें गोंय पंचायतीन बांदकाम परवानो निलंबीत केलो. सध्या हे प्रकरण न्यायालयांत आसा, अशें मुख्यमंत्री डॉ. प्रमोद सावंत हांणी चर्चेत हस्तक्षेप करतना सांगलें. आमदार विरेश बोरकार आनी युरी आलेमांव हांणीय चर्चेत वांटो घेतलो. पयलीं हे ल्हान ‘लोज’ आसले. आतां बंगलो जाला, अशें विरेश बोरकार हांणी सांगलें. फुडारांत दायज थळा कुशीक बांदकाम येवचे ना, म्हूण जतनाय घेवपा सयत कायदो करपाची गरज आमदार क्रूज सिल्वा हांणी उक्तायली.
ह्या बंगल्या आड कारवाय जावची, म्हूण नागरिकांनी आंदोलनां केल्यात.
बांदकामाक परवानो दिलोच कसो?
पोरणें गोंय दायज थळ आसतनाय थंय अशा बेकायदो बांदकामाक परवानो दिलोच कसो, असो प्रस्न आमदार विरेश बोरकार हांणी केलो. दायज थळ आशिल्लो वाठार संवेदनशील क्षेत्र म्हूण जाहीर करचे. थंय बफरझोन आसचो, अशी मागणीय तांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
