भांगरभूंय | प्रतिनिधी
नवी दिल्ली, खबरां संस्था ः लोकसभा अध्यक्ष ओम बिर्ला हांणी मंगळारा अलाहाबाद उच्च न्यायालयाचे न्यायाधीश यशवंत वर्मा हांचे आड रोख घोटाळ्याच्या प्रकरणांत महाभियोग प्रस्ताव मंजूर केलो. रविशंकर प्रसाद आनी विरोधी फुडारी सयत वट्ट 146 वांगड्यांनी सय केल्लो प्रस्ताव म्हाका मेळ्ळा अशें अध्यक्षान सांगलें.
अलाहाबाद उच्च न्यायालयाचे न्यायाधीश यशवंत वर्मा हांकां आपल्या पदा वयल्यान काडून उडोवपाची मागणी ह्या प्रस्तावांत केल्या अशें अध्यक्षान सांगलें. अध्यक्षान चवकशे खातीर 3 वांगड्यांच्या समितीची घोशणा केली. तातूंत सर्वोच्च न्यायालय आनी उच्च न्यायालयांतल्यान दरेकीं एक न्यायाधीश आनी एक न्यायशास्त्रज्ञ हांचो आस्पाव आसा. चवकशी समितीचो अहवाल येय मेरेन महाभियोग प्रस्ताव प्रलंबीत उरतलो. सत्ताधारी आनी विरोधी दोनूय पक्षांतल्या वट्ट 146 वांगड्यांनी ह्या प्रस्तावाचेर सय केल्या.
काडून उडोवपाचें कारण कितें?
अंदूं 14 मार्चाक न्यायमूर्ती वर्मा हांच्या अधिकृत निवासस्थानांत उजो लागलो. त्या वेळार ते दिल्ली उच्च न्यायालयांत काम करताले. उजो पालोवपी दळान उजो पालयले उपरांत तांच्या घरांतल्या एका कुडींत 500 रुपयांच्य नोटींचें जळिल्ले बंडल मेळ्ळे.
महाभियोग प्रस्ताव म्हणल्यार कितें?
उच्च न्यायालयाच्या वा सर्वोच्च न्यायालयाच्या न्यायाधीशाक पदा वयल्यान काडून उडोवपा खातीर संसदेच्या खंयच्याय एका सभाघरांत महाभियोग प्रस्ताव मांडूं येता. हो प्रस्ताव पयलीं राज्यसभेचे सभापती वा लोकसभेच्या अध्यक्षा मुखार मांडटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
