न्यायाधीशपदांचे भरती परिक्षेक आव्हान

भांगरभूंय | प्रतिनिधी

पणजीः मुंबय उच्च न्यायालयान गोंयांत कनिश्ठ विभाग दिवाणी न्यायाधीश आनी प्रथमवर्ग न्यायाधीशपदां खातीर भरती प्रक्रिया सुरू करून 11 जाणांची निवड केल्या. हे भरती प्रक्रियेचे मुख्य परिक्षेच्या पेपर ।। (फौजदारी) विशयांतले लेखी परिक्षेचो उत्तरपत्रिका वेवस्थीत तपासूंक ना. तशेंच गुणांचो फरक आशिल्ल्याचो दावो करून मुंबय उच्च न्यायालयांत आव्हान दिलां. ह्या प्रकरणाची फुडली सुनावणी 7 फेब्रुवारीक जातली.

ह्या प्रकरणांत अजय हळर्णकार हांणी याचिका दाखल केल्या. तातूंत तांणी मुंबय उच्च न्यायालयाचे प्रसासकीय निबंधक, गोंय राज्य सरकारा सयत श्रेया कासकार, वृत्तिका प्रभू, योगेश गांवकार, प्राची गाड, प्रतिक्षा दाभोळकार, सुनामिलक्ष्मी कोळंबकार, चिकिता तुळकार, शुभेच्छा आजगांवकार, समर्थ नायक, रीहा हळर्णकार आनी प्रशिला वेळीप ह्या निवड जाल्ल्या उमेदवारांक प्रतिवादी केल्यात.

मुंबय उच्च न्यायालयान गोंयांत कनिश्ठ विभाग दिवाणी न्यायाधीश आनी प्रथमवर्ग न्यायाधीशपदा खातीर भरती प्रक्रिया सुरू केल्या. ते खातीर 15 मार्च 2024 ह्या दिसा जायरात दिल्ली. ताका याचिकादार अजय हळर्णकार हांणी अर्ज केलो. 22 सप्टेंबर 2024 ह्या दिसा मुख्य लेखी परिक्षा घेतली. तातूंत पेपर । (दिवाणी) आनी पेपर ।। (फौजदारी) अशे दोन विशयांत लेखी परिक्षा घेतिल्ली. तातूंतल्या दिवाणी विशयांत याचिकादाराक 51 गूण मेळ्ळे. ताका लागून तो त्या विशयांत पास जालो, जाल्यार फौजदारी विशयांत ताका 38 गूण मेळ्ळे. याचिकादारान फौजदारी स्वरुपाच्या खटल्यांत प्रथमवर्ग न्यायालयांत सरकारा वतीन बाजू मांडल्या. तशेंच ताका ह्या विशयांत बरें गिन्यान आशिल्ल्यान तांणी म्हायती हक्क कायद्या खाला प्रस्नपत्रिका मागयली. 1 जानेवारी 2025 ह्या दिसा ताका प्रस्नपत्रिका दिल्ली. त्या वेळार फौजदारी पेपराचें मुल्यांकन करतना परिक्षकान वट्ट 100 गुणां बदला 104 गूण धरले. तशेंच याचिकादारान मेळयल्ले गूण मेजतना परिक्षकान लेगीत चूक करून 42 बदला 38 गूण दिल्यात.

भरती प्रक्रिये प्रमाण परिक्षकान गुणांचे मुल्यांकन केले उपरांत मॉडरेटराक उत्तरपत्रिका तपासची पडटा. मात याचिकादाराचे बाबतींत मॉडरेटरान उत्तरपत्रिका तपासूंक ना वा मुल्यांकन करूंक ना. ताका लागून वयले मुद्दे उपस्थीत करून याचिकादारान फौजदारी विशयांतले लेखी परिक्षेची उत्तरपत्रिका वेवस्थीत तपासूंक ना, तशेंच गुणांचो फरक आशिल्ल्याचो दावो याचिकेंत केला. हेच मजगतीं, 2 जानेवारी 2025 ह्या दिसा उच्च न्यायालयान फुडली भरती प्रक्रिया सुरू दवरून 11 उमेदवारांची निवड केल्या. ताका लागून याचिकादारान याचिका दाखल करून फौजदारी उत्तरपत्रिकेचें पुनर्मुल्यांकन वा पुनर्तपासणी करपाचे निर्देश दिवपाची मागणी केल्या. तशेंच भरती प्रक्रिया स्थगीत दवरपाची आनी नियुक्ती आदेश जारी करचो न्हय असो निर्देश दिवपाची मागणी केल्या. मजगतीं, ह्या प्रकरणाची मुंबय उच्च न्यायालयांत 7 फेब्रुवारीक फुडली सुनावणी जातली. त्या वेळार उच्च न्यायालयाचे प्रशासकीय निबंधक प्रतिज्ञापत्र दाखल करतले.