भांगरभूंय | प्रतिनिधी
नवी दिल्ली, खबरां संस्था : सर्वोच्च न्यायालय आनी उच्च न्यायालयांच्या २१ निवृत्त न्यायाधीशांनी सरन्यायाधीश धनंजय चंद्रचूड हांकां एक पत्र बरयलां.
कांय गट न्यायवेवस्था दुबळी करपाचो मुद्दाम यत्न करपाक लागल्यात, अशें ह्या निवृत्त न्यायाधीशांनी पत्रांत म्हणलां. हातूंतले चार न्यायाधीश सवोच्च न्यायालयाचे आसात.
कांय घटक संकुचीत राजकी हितसंबंद आनी वैयक्तीक फायद्यांनी प्रेरीत जाल्यात. ते न्यायवेवस्थे वयलो लोकांचो विस्वास उणो करपाचो यत्न करतात. न्यायालयाचे प्रक्रियेचेर चेपण घालपाचो यत्न जावपाक लागला. ताका लागून फक्त न्यायवेवस्थेच्या पावित्र्याचो अनादर जायना, तर कायद्याचे रक्षक ह्या नात्यान न्यायमूर्तींनी सोपूत घेतिल्ल्या निश्पक्षतेच्या तत्वांक आव्हान दिल्ले सारकें जाता. ताका लागून लोकांचो आमचे वयलो विस्वास उणो जावचो न्हय, अशें आमकां दिसता, अशें तांणी म्हणलां.
चुकीचे म्हायतीच्या आदारान न्यायवेवस्थेच्या विरोधांत उलयतात, ताचे विशीं हुस्को जाता. हें फक्त अनैतिकूच न्हय तर लोकशाहीच्या तत्वां खातीरुय हानीकारक आसा. न्यायालयाचो एखादो निर्णय एखाद्याच्या मता कडेन जुळपी आसत तर ताची तुस्त करप आनी तसो तो ना जाल्यार खर टिका करप, ही पद्दत कायद्याच्या नेमा संदर्भात योग्य न्हय, अशें ह्या न्यायाधिशांनी पत्रांत म्हणलां.
ह्या न्यायाधिशां मदीं सर्वोच्च न्यायालयाचे आदले न्यायमूर्ती दीपक वर्मा, कृष्णा मुरारी, दिनेश माहेश्वरी आनी एम आर शाह, तशेंच उच्च न्यायालयाचे आदले न्यायाधीश परमोद कोहली, एस एम सोनी, अंबादास जोशी, एस एन धिंग्रा आनी हेरांचो आसपाव आसा.
फाटीं नामनेच्या वकिलांनीय कांयशें अशेंच पत्र सरन्यायाधीशांक बरयिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
