भांगरभूंय | प्रतिनिधी
पुराय संवसारान काल 29 जुलय हो विशमताये आडचो दीस म्हूण पाळ्ळो. जगांतली समाजीक अर्थीक, राजकी आनी हेर तरांची विशमताय तशेंच सांस्कृतीक विशमताय सोंपोवपाचो आनी भेदभाव मिटोवन समानताय प्रस्थापीत करपा खातीर लोकां मदीं जागरुकताय वाडोवपाचो हो दीस. सगल्या लोकां खातीर वा समाजांतल्या दरेक घटकाक समान संदी मेळोवन दिवप तशेंच सगल्यां खातीर न्याय सुनिश्चीत करप, कसल्याय कारणांक लागून जावपी भेदभावाक विरोध करप, तेच परीं विशमताये वरवीं नकारात्मक परिणाम उणे करपा खातीर उपाय येवजण्यो आंखप असो ह्या दिसाचो मुखेल हेत. ह्या दिसा निमतान सगले तरेचे विशमताये आड ज्या- ज्या म्हापुरसांनी आपल्या जिवाची पर्वा करिनासतना भोंवतणच्या संवसारांत समानताय हाडपा खातीर खंड घालिनासतना खूब यत्न केले, तांची याद काडपाचो हो दीस.
मनशाक मनशा भशेन वागोवप हो मनीसपणाचो धर्म. धर्मीक ग्रंथांनी म्हळां, Love others as you love yourself.दुसऱ्यांचेर तुजे वरींच माया करीत राव. दुसऱ्यांक मोग दी. मनीसपणाचें दुसरें नांव मोग. धर्तरे वयल्या दरेक जिवांचो मना सावन, काळजांत सावन मोग करप हेंच खरें मनीसपण. दिवप, घेवप, गुपीत सांगप, गुपीत गजालीं विशीं विचारपूस करप, जेवप, जेवण दिवप, आस्वाद घेवप वा आस्वाद घेवंक दिवप आदीं मोगाचीं स लक्षणां. तीं वा हो मोग जिणेक चालना दिता. ज्या मनशां कडेन आपलो संबंद येता तांचे कडेन समरसताय प्रस्थापीत करप म्हळ्यारच मोग. मोगांत समानतायेन वागप होच मनीसपणाचो धर्म.
सगले कडेन समानताय राखपाक काळीज आनी इत्सा आदाराची समानताय दाखोवन तांकां सेवा दिवप ही सभावीक वृत्ती आसा. जिणेचो आदार आसा. समानताय राखपा खातीरची सेवा ही जग फुलयता. मनीस जितलो मनीसपणा कडेन दुर्लक्ष करता तितलो तो आपसूक जनावरांची वृत्ती आपणायिल्ले वरवीं थारता. मनीसपण हें सगल्या धर्मांचो सार. मनीसपणाचो धर्म हो संवसारांतल्यान मोक्षा कडेन व्हरपी पूल आसा. पूण हो मनीसपणाचो धर्म शेंकड्यांचीं शेंकड्यां वर्सां वेवस्थीतपणान पाळप जालो ना. हाकाच लागून मनशां मनशां मदीं भेदभाव निर्माण जाले. तातूंतल्यानच आपलें वर्चस्व राखून दवरपाक उंचेल्या पावंड्याच्या लोकां कडल्यान दुबळ्या मनशांचे मुळावे हक्क न्हयकारप जालें. कोट्यांनी लोकांचेर अन्याय अत्याचार वाडत गेले. नकळटां, विशमताय दिशीं दिशीं फुगत गेली. मनशांची जात, भास, वर्ण आदी भेदभावांतल्यान धुमशेंणां कांडूंक लागली. उंचेल्या दर्ज्याच्या, जातीच्या लोकांचे नदरेंत सकयल्या जातीच्या लोकां कडेन समानताय उरलीं ना. आनी…..
… इतिहासाची नोंद घेतली जाल्यार संवसारांतले म्हान फुडारी राष्ट्रपिता महात्मा गांधी, डॉ. बाबासाहेब आंबेडकर, अमेरिकेचे राष्ट्राध्यक्ष अब्राहम लिंकन, मार्टिन ल्युथर किंग, नेल्सन मंडेला हांणी ही विशमताय सोंपोवपाचो यत्न तांचे जिणेंत केलो. तांचे जिणेंतलो तो संघर्श इतिहासांत कोंरातून उरला…. अमेरिकेचे राष्ट्राध्यक्ष अब्राहम लिंकन हांणी सामकें सकयल्या पांवड्या वयलें जिवीत जगपी कृष्णवर्णियांक गुलाम गिरींतल्यान मेकळें केलें. तांका परिणाम कितें भोगचो पडलो?… 1865 वर्सा गुलामगिरी मुक्तिचो कायदो सभाघरांत मान्यतायेक आयले उपरांत सप्तका भितर प्रतिगामी शक्तीन लिंकन हांची हत्या केली.
राष्ट्रपिता महात्मा गांधी हांची राजकी कारकीर्द वर्णदुस्वासी आडच्या लढ्यांतूच जाली. वकिली वेवसाया खातीर ते दक्षीण आफ्रिकेंत गेल्ले आसतना थंय काळ्या वर्णाच्या लोकांक मेळपी वागणूक तांचे नदरेंत आयली. गांधीजींचो लेगीत जायत्या सुवाळ्यांनी, घडणुकांनी अवमान जाला. तातूंतल्यानच त्या वेळार तांच्या काळजांत सगल्याक समाजीक समानताय हाडपा खातीरचें बींय रुजवणेक आयलें. भारतीयांक मतदानाचो हक्क न्हयकारपी कायद्या आड गांधीजीनी व्हड आंदोलन उबारलें. एकोणिसाव्या शेंकड्याचे अखेरेक सुरु केल्लें हे चळवळीक यश आयलें तें विसाव्या शेंकड्याचे अखेरेक. महात्मा गांधीजींच्या हे चळवळींतल्यान प्रेरणा घेवन नेल्सन मंडेला ह्या युगपुरसान वर्ण दुस्वासी आडच्या आंदोलनाची ज्योत तेवत, पेटत दवरली. 90 वर्सां पिरायेच्या मंडेलान 27 वर्सां बंदखणींत रावून वर्ण दुस्वासी आडच्या आंदोलनाचें यशस्वी रीतीन फुडारपण केलें.
भारताच्या संविधानाचे शिल्पकार जांकां मानल्यात ते डॉ.. बाबासाहेब आंबेडकर हे तर दलितां खातीर देवूच थारल्यात. ‘शिकात, संघटीत जायात, आनी संघर्श करात.’ हो मंत्र दिवपी डॉ. आंबेडकर हाणी अन्याय अत्याचाराच्या चेंपणांत घुस्पटपी दुबळ्या दलितांची पिळणूक थांबयली. मानवी हक्कांचे पुरस्कर्ते आशिल्ले मार्टिन ल्युथर किंग हांकां फक्त 39 वर्सांचें जिवीत लाभलें. पूण दीन दुबळ्यांच्या हिता खातीर झर झर झरपी ह्या फुडाऱ्यान आपले सेवे वरवीं अल्प काळांतूच इतिहासांत आपलें नांव कोरांतून दवरलें. ह्या महामानवांचो आदर्श दवरप हीच तांकां खरी श्रद्धाजली थारता.
कोणे एका संतान म्हणिल्लें आसा,
‘मानव तितुका एकच आहे,
उच्च ना कोणी,नीच न कोणी’
हो संदेश आमी दर एकल्यान आमच्या जिवितांत पाळूंक जाय. आमचे मदीं आशिल्ले भाशाभेद, प्रांतभेद, वर्णभेद तशेंच एकामेकां भितर आशिल्ले मतभेद आमी विसरूंक जाय. समानतायेची घुडी भुजार घेवन आमी आमचे सेवे सयत ती हुबोवंक जाय. ….जायत व्हय? विशमता विरोधी दीस हो समाजांतल्या दरेक घटकांक समान संदी आनी न्याय मेळोवन दिवपा खातीर एक म्हत्वाचो दीस. समाजांतल्या मनांतली सामाजीक विशमताय जो मेरेन नश्ट जायना तो मेरेन समाजाची उदरगत जावची ना. ह्या विशमताये आड आमी सगले एकठांय येवया आनी विशमतायेच्या आड झुजपाचो, तशेंच एक न्यायपूर्ण समाजाच्या निर्मिती खातीर यत्न करपाचो सोपूत घेवया.
उल्हास यशवंत नायक
8010061867
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
