भांगरभूंय | प्रतिनिधी
नवी दिल्ली, खबरां संस्था: भारतांत आतां ‘अंधा कानून’ आसचो ना. भारतीय न्यायवेवस्थेचें प्रतीक आशिल्ले न्यायाचे मुर्तींत व्हड बदल जाला. न्यायदेवीच्या दोळ्यांचेर आशिल्ली काळी पट्टी काडून उडयल्या. न्यायदेवतेची नवी मुर्ती सर्वोच्च न्यायालयाच्या वाचनालयांत बसयल्या. पयलीं न्यायदेवतेच्या एका हातांत तागडी आनी दुसर्या तलवार आसताली. आतां तलवारीच्या जाग्यार भारतीय संविधान दिल्लें आसा. मुखेल न्यायाधीश डी. वाय. चंद्रचूड हांच्या सुचोवण्यां प्रमाण ही मूर्ती सर्वोच्च न्यायालयाच्या वाचनालयांत बसयल्या.
कायदो कुड्डो अशें आमी खूबदां आयकलां. न्याय देवतेचे दोळे धांपतात हें आमी खुबदां सिनेमांनी पळयलां. न्यायदेवी एका हातांत तरसाद आनी दुसर्या हातांत तागडी धरता. पूण आतां दोळ्यांची पट्टी काडून उडयल्या आनी तिच्या एका हातांत एक तलवार बदलून संविधान दिलां. हाचे वेल्यान देशांतलो कायदो कुड्डो न्हय वा शिक्षेचें प्रतीकूय न्हय, असो संदेश दिला.
ह्यान पयलींय दोळे धांपून दवरिल्ली न्यायाची मूर्त कायद्याच्या समानतेचें प्रतिनिधित्व करता. ताचो अर्थ न्यायालयांत येवपी कोणूय खंयच्याय मनशाची गिरेस्तकाय, सत्ता वा दर्जो पळोवन निपक्षपातीपणान न्याय दितलो जाल्यार तलवार ही अन्यायाची ख्यास्त दिवपाचें प्रतीक. नवे मुर्तेंतल्यान समाजांतल्या संतुळेचें प्रतिबिंब दिसता, न्यायालयान खंयच्याय निश्कर्शाचेर पावचे पयलीं दोनूय वटांच्या तथ्यांचो आनी वादांचो सारको विचार करचो अशें मुखेल न्यायाधीशाचें मत आसा. कायदो केन्नाच कुड्डो न्हय. तो सगळ्यांक समान वागणूक दिता. देखून देवीच्या एका हातांत तरसाद नासून संविधान आसूंक जाय, जाका लागून ती राज्यघटने प्रमाण न्याय दिता असो संदेश समाजांत वतलो.
न्यायाची देवी ही पुर्विल्ली ग्रीक देवता, न्यायाचें प्रतीक अशें मानतात. तिचें नांव जस्टिया. जस्टीस हो शब्द तिच्या नांवा वयल्यान तयार जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
