भांगरभूंय | प्रतिनिधी
पणजी : नौदळा वतीन २१ फेब्रुवारीक नौदळ झूज महाविद्यालयांत पांचव्या गोंय सागरी परिशदचें आयोजन केलां. संरक्षण राज्यमंत्री संजय सेठ मुखेल सोयरे आसतले. परिशदेक १४ देशांचे नौदळ मुखेली हाजीर रावतले. ही परिशद नौदळाचो एक म्हत्वाचो धोरणात्मक उपक्रम आसा. समकालीन सागरी आव्हानांचेर परिणामकारक आनी वेव्हारीक उपाय काडपा खातीर हो उपक्रम उपेगी थारतलो.
परिशदेंत बांगलादेश, कोमोरोस, इंडोनेशिया, केनिया, मादागास्कर, मलेशिया, मालदीव, मॉरिशस, म्यानमार, सेशेल्स, सिंगापूर, श्रीलंका, थायलंड आनी टांझानिया ह्या देशांचे नौदळ मुखेली हाजीर रावतले. भारताचे नौदळ मुखेली एडमिरल दिनेश त्रिपाठी यजमानपदार आसतले. हिंदी महासागर वाठारांतल्या सामायीक सागरी सुरक्षा आव्हानां, अवैध-अनियंत्रित नुस्तेंमारी, हेर अवैध सागरी कृतीं पसून जाणवपी धोक्यांचो प्रतिकार करपा विशीं परिशदेत चर्चा करतले.
हिंदी महासागरांत विवीध आव्हानांक तोंड दिवचें पडटा. हाका लागून प्रादेशीक सुरक्षा, उपजीविकेचेर परिणाम जाता. दर्या आतंकवादद, तस्करी, बेकायदेशीर आनी अप्रमाणित नुस्तेंमारी, चाचेगिरी, अनियमीत स्थलांतर अश्या धोक्यांक लागून सुरक्षीत दर्याच्या उद्दिष्टां मुखार आडमेळीं येतात. हवामान बदल, सायबर धोके आनी छुप्या पद्धतीन जावपी सागरी येरादारी अश्या नव्या आव्हानांक लागून हे धोके आनीक वाडटात.
हे परिशदेंत नामनेचे वक्ते आनी तज्ज्ञ सागरी क्षमता घटमूट करपा खातीर जोड यत्नांचेर लक्ष केंद्रीत करतात. आदले नौदळ मुखेली (निवृत्त) एडमिरल अरुण प्रकाश हे मुखेल भाशण दितले. हिंदी महासागर मळावेल्या सागरी सुरक्षा आव्हानांचेर संयुक्तपणान उपाय तयार करप आनी ते अंमलात हाडपाक गोवा सागरी परिशद ही एक म्हत्वाची माची. भारत आनी हिंदी महासागरी मळावेल्या महत्त्वाच्या देशांमदीं समन्वय, परस्पर सामंजस्य वाडोवप अश्या गजालीं खातीर हो उपक्रम सुरू केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
