भांगरभूंय | प्रतिनिधी
वास्को : नौदळाचे राकेश मनोज बेदी हांणी २८ फेब्रुवारी ते २ मार्च मजगतीं ग्रीसांतल्या अथेन्सांत जाल्ल्या ऍक्रोपुलीस आंतरराष्ट्रीय वुशु चॅम्पियनशीप सर्तींत ७५ किलो वजनाच्या पंगडांत रुप्या पदक जिखून भारताचें नांव वयर काडलें. सध्या गोंयांत काम करपी बेदी हे एक अणभवी राष्ट्रीय आनी आंतरराष्ट्रीय वुशु, जु-जित्सू आनी ज्युडो खेळगडे. तशेंच प्रमाणीत लेव्हल-०४ फिटनेस प्रशिक्षक.
तांणी हाचे पयलीं ३७ व्या राष्ट्रीय खेळ गोंय, तशेंच संवसारीक चॅम्पियनशीप २०२४ आनी नॉर्डीक कप २०२४ त भारताचें प्रतिनिधित्व केलां. बेदी हांची येवपी संवसारीक खेळ २०२५ (चीन) आनी आशियाई चॅम्पियनशीप २०२५ (जॉर्डन) खातीरूय निवड जाल्या. हाका लागून भारतांतल्या उत्कृश्ट मार्शल आर्टिस्टां मदीं तांचें स्थान आनीक घटमूट जालां. बेदी हांणी तांचे कमांडिंग ऑफिसर आनी नौदळाच्या ट्युनिर बोटीचे कार्यकारी अधिकारी, वुशू असोसिएशन ऑफ इंडिया, गोवा वुशू असोसिएशन, प्रशिक्षक किलमन पावलो फर्नांडीस आनी जायत्या मार्गदर्शक आनी बरें मागप्यांचे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
