भांगरभूंय | प्रतिनिधी
अशें म्हण्टात आमच्या देशाचे सैनिक जर बरें काम करीत, तर आमकां बरे दीस येतले आनी हें बरेच खेपो खरें थारलां. आमचें सैन्य कितल्याशाच कठीण परिस्थितींतल्यान गेलां, तरी तांणी आमकां सुरक्षीत दवरल्यात. आतां मोदी सरकारान आमचें सैन्य बरें घटमूट जावंचें म्हूण थळाव्या उत्पादनाक संद दिवची केल्या, इतलेंच न्हय तर बऱ्याच वस्तुं खातीर आमी परदेशाचेर अवलंबून रावताले., त्यो गजाली लेगीत देशां भितर करपाचें थारायलां. ताची सुरवात लेगीत केल्या. आतां खासगी शिक्षण फांटो लेगीत उक्तो करपाक परवानगी दिल्या. हें सगलें सांगपाचें कित्याक तर हालींच भारतीय नौदळाची जायरात काय सुवातां खातीर आयल्या. ताचो नोकरी करपाक इत्सुकांनी जरूर विचार करचो. खूब जाणांची मानसिकताय आसता की आमकां सरकारी नोकरी जाय म्हूण, नोकरी सुरक्षा दिवपी आसपाक जाय आनी बरो आनी खात्रेन मेळपी पगार जाय, ह्यो दोनूय गजाली ह्या नोकरेंतल्यान तुमकां मेळूं शकतात.
आमच्या नौदळा विशीं आमी म्हायती घेवपाची केली तर तुमच्या लक्षांत येतले की 17 व्या शेंकड्यांतले शिवाजी महाराज हे भारतीय नौदळाचे जनक आसात. 1934 सालांत ब्रिटिशांनी सुरु केल्ले रॉयल इंडियन नेव्हीन आधुनिक पर्वाक सुरवात जाली. तुमकां खबर आसतली की 1971 च्या भारत- पाक झुजांत नेव्हीन बरी कामगिरी केल्ली, म्हूण आमचें जैत सोंपें जालें. हो दीस म्हळ्यार 4 डिसेंबर, जो आमी नौदल दीस म्हूण मनयतात. आमचें नौदळ हें संवसारांतलें पांचवें लागता. 155 तोफो ताचे कडेन आसात, 200 मरीन कमांडो आसात. अशा नवीन जाग्यार नोकरी करपाची संद तुमकां मेळूं शकता. नौदलान फार्मसीस्ट, फायरमन, पेस्ट कंट्रोल वर्कर सारक्यो सुवाती आसात आनी जायरात दिवन ते अर्ज मागयतात. आतां जी जायरात नौदळान दिल्या तांतूंत 56 आंकवार दादले /बायल उमेदवारां कडल्यान अर्ज मागयल्यात. तुमकां 6 नोव्हेंबर मेरेन हे अर्ज दिवपाचे आसात. www.joinindiannavy.gov.in ह्या संकेतस्थळाक भेट दिवन तुमी हे विशीं चड म्हायती घेवं शकतात. फुडें लेगीत हें संकेतस्थळ जरूर पळोवचें, कित्याक तर नौदळा भितर आनी खंयच्या सुवातींची तांकां गरज लागतली तें कळटा. खाशेली गजाल म्हळ्यार नौदळांत तुमची निवड मेरिटाचेर जाता.
जनरल सर्व्हिस (56), एअर ट्रॅफिक कंट्रोलर (5), नेव्हल एअर ऑपरेशन ऑफिसर (15), पायलट (25), लॉजिस्टिक्स (20), एज्युकेशन (12), अभियांत्रिकी (25), इलेक्ट्रिकल (45), नेव्हल कन्स्ट्रकटर (14) अशो सुवाती आसात, हातूंतल्यो सुवाती ह्यो हंगामी स्वरुपाच्यो आनी प्रशिक्षणाची संद आसा. देश सेवा करपाची एक बरी संद तुमकां मेळटली. नौदळाचो फांटो तुमकां नोकरेची सुरक्षा दिता. कांय वर्स सेवा दितकच तुमी स्वेच्छा निवृत्ती घेवं शकतात. मागीर जर तुमी यत्न केलो तर सरकारी नोकरेक एक्स सर्व्हिसमन म्हूण संद घेवं शकतात. संकेतस्थळाक चड जाण भेट दित जाल्यार ताचेर भार येवं शकता, म्हूण बेगीन भेट दिवप चड बरें. अरबी समुद्र, हिंद महासागरांत टेहळणी करपाचें काम नौदळ करता. अशें म्हण्टात की जो हिंद महासागराचेर नियंत्रण मेळयता तो आशियेचेर राज्य करू शकतात. हीं उतरां आसात, इतिहासकार आनी नौदळांत एक अधिकारी आल्फ्रेड मेहन हांची. हांचे वेल्यान नौदळाचो वावर कितलो महत्वाचो आसा आनी संद मेळत तर तुमचो वांटो लेगीत म्हत्वाचो थारूं येता हें कळटा. नौदळांतल्या प्रत्येकाचो वावर म्हत्वाचो.
एडन हांगां सोमाली चाचे बोटी लुट्टात. तांचे खातीर 2008 सावन कायम स्वरुपांतली टेहळणी सुरु केल्या. गोंयांक 105 किलोमिटराचो दर्या आसा म्हणून तर नौदळाचो तळ हांगां आसा. हर काम देश के नाम, हे नजरेन नौदळाचो दरेक कॅडेट काम करता. देखीक एज्युकेशन ह्या सुवाते खातीर जर तुमी इत्सुक आसा तर तुमकां कॅडटांक प्रशिक्षण दिवपाचें महत्वाचें काम करचें पडटलें. सैन्य, लश्कर म्हणलें काय आमकां झूज दोळ्यां मुखार दिसता, पूण काय सुवाती सैनिकांक झुजपाचें शिक्षण दिवपी लोकां खातीर आसता, हें आमी विसरूंक जायना.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
