भांगरभूंय | प्रतिनिधी
मडगांव : नौदळांत नोकरी दितां म्हूण सांगून एकल्याक 6 लाख 80 हजार रुपयांक तोपी घालपाचें प्रकरण मुखार आयलां. दवर्लेच्या सचीत नायक हांणी एका दुबावीत बायले आड मडगांव पुलिशेंत कागाळ दाखल केल्या. पुलीस कागाळीची सत्यता तपासतात. सचीतान दिल्ले म्हायती प्रमाण, तो मडगांवां एका कॅफेंत कामाक आशिल्लो तेन्ना ताका तोपी घाल्ली बायल जी मूळ कारवारची आसा ती थंय सदांच येताली. तिचे कडेन नौदळाचे फॉर्म आसताले, आनी ती थंय नोकरी मेळोवन दिता म्हूण सांगताली. 2017 त तिणें ताचे कडल्यान फॉर्म भरून घेतलो. 15 दिसांनी पयशें मागले. उपरांत लॅपटॉप, नौदळाचो गणवेश अश्या गजालींक पयशें मागलें. त्या काळांत ताणें तिका साडेतीन लाख रुपया दिले. मॅडिकल खर्चाच्या नांवानूय तिणें पयशें घेतले. 5 वर्सां ती ताचे संपर्कांत आशिल्ली. उपरांत तिणें ताचो फोन घेवपूच बंद केलो. तिचो फोनूय बंद मेळपाक लागलो. म्हूण तो कारवारा तिच्या घरा आपल्या आवय – बापायक बरोबर घेवन गेलो. तिच्या घरच्यांनी तिचे वेव्हार तांकां खबर ना म्हूण सांगलें. कारवारच्या पुलीस स्टेशनार गेल्यार तांणी जंय पयशें दिलें थंयच्या पुलीस स्टेशनांत कागाळ कर म्हूण सांगलें. कारवारा तिच्या कुटूंबाचेर 22 कागाळी दाखल आसात, अशें खंय ताका कळ्ळां. ते खातीर ताणें आतां मडगांव पुलीस स्टेशनांत कागाळ केल्या. आतां मेरेन ताणें खंय ते बायलेक 6 लाख 80 हजार रुपया दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
