भांगरभूंय | प्रतिनिधी
भांगरभूंय । प्रतिनिधी
वास्कोः भारतीय नौदलाच्या ताफ्यांतल्या मार्मगोवा ह्या झुजा बोटीच्या प्रतिकृतीचें अनावरण वास्कोचो आमदार कृष्णा साळकार हाचे हस्तुकीं बुधवारा जालें. ही प्रतिकृती वास्कोकारां खातीर अभिमानाची गजाल आसा. तिका लागून वास्कोच्या सोबितकायेंत भर पडटली शिवाय नवे पिळगेक मार्मगावो बंदराचो इतिहास समजून घेवपाक मजत जातली अशें साळकारान ह्या वेळार सांगलें. मार्मगोवा ही झुजा बोट मुंबयच्या माझगांव डॉकयार्डांत बांदल्ली.
वास्को शारांत सेंज जोसेफ इन्सिटयूटच्या सामकारच्या येरादारी जुंव्यार ही प्रतिकृती उबारल्या.अनावरण कार्यावळीक भारतीय नौदलाच्या गोंव विभागाचे ध्वजाधिकारी अजय थेओफिलुस, मुरगांवचो नगराध्यक्ष गिरीश बोरकार, नरसेविका शमी साळकार, श्रद्धा महालें,नगरसेवक दामोदर कासकार, नारायण बोरकार तशेंच जयंत जाधव, किरण नायक, प्रशांत नार्वेकार आनी सेंट जोसेफाचे विद्यार्थी हाजीर आशिल्ले.
पांच म्हयन्यां आदी प्रतिकृती विशीं चर्चा जाली ते्न्नी ही प्रतिकृती पणजींत उबारपाचो प्रस्ताव आशिल्लो. पूण मार्मगोवा बंदर वास्कोंत आशिल्ल्यान ती प्रतिकृती वास्कोतूच उबारपाक जाय अशें हांवें नौदल अधिकाऱ्यांक सांगलें. तांणी मुख्यमंत्र्यांची मंजुरी हाडपाक सांगलें. ती आमी मेळयली आनी प्रतिकृती वास्कोत आयली अशी म्हायती साळकारान दिली. तिचें उक्तावण 19 फेब्रुवारीक शिवजंयती दिसा करपाचें आशिल्लें. मात कांय तंत्रीक कारणाक लागून तिचें बुधवारा उक्तावण करचें पडटलें अशें साळकारान सांगलें. अजय थेओफिलुस हांणी मार्गगोवा प्रतिकृतीच्या अनावरणा खातीर खोस उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
