भांगरभूंय | प्रतिनिधी
भांगरभूंय । प्रतिनिधी
वास्कोः भारतीय नौदला कडल्यान थळाव्या लोकांक कांय सुविदा दिताले. नागरी संबंद बरे उरचे हे खातीर नौदल अधिकारी यत्न करताले. मात आतां नौदलाचे भूमकेंत बदल जाला आनी थळाव्यांक समस्यांक तोंड दिवचें पडटा. ताका लागून असंतोष वाडपाक लागला. मुख्यमंत्री डॉ प्रमोद सावंत हाणी हातूंत लक्ष घालून संबंद सुदारपाचे यत््करचे अशें चिकोळणे- बोगमाळाचो सरपंच संकल्प महाले हाणे मागलां.
दाबोळेच्या फनेल विभागांत येवपी कांय बांदकाम मोडल्यात. घर धनयां कडेन सगली कागदपत्रां आसात. घराचें उंचाये संबदी नौदलान मान्यताय दिल्ली. मात आनी निकस बदल्ल्यान आनी मुरगांव उदरगत आनी नियोजन प्राधिकरणान (एमपीडीए) घरां मोडपाक सुरवात केल्ल्यान थळाव्या लोकां मदीं भिरांत पातळ्ळ्या. हातूतं चिकोळणे- बोगमाळो पंचायत मंडळान लक्ष घातलां. सरपंच, उपसरपंच आनी कांय पंचानी नौदलाच्या पयलींच्या आनी सध्याचे भूमिकेचेर भाश्य करपाक सुरवात केल्या. नौदल आनी लोकां मदले संबंद चड ताणचे पयलीं उपाय येवजण करपाची गरज तांणी उक्तायल्या.
चिकोळणे हांगा भारतीय तट राखण दलान व्हडल्यो इमारती बांदल्यात. ते खातीर थळाव्या प्रशासना कडल्यन कसलेच परवाने घेवंक ना. आमका थळाव्या यंत्रणेच्या परवानगीची गरज ना, आमी केंद्र सरकाराच्या अख्यत्यारींत येतात अशें ते सांगतात. कांय इमारती बांदतना सीआरझेड कायद्याचें उल्लंघन केलां. ह्या इमारतीतल्या लोकांनी वापरल्लें उदक व्हिएरा नगरांतल्या कांय लोकांच्या बंगले आनी घरां कडेन पावता. कागाळ करून लेगीत कांय जायना. नौदल आनी तट राखण दल बांदकामां संबंदी कसलोच कर थळावे पंचायतींत दिना. ताका लागून येणावळ बुडटा. नौदलान आपल्या कंपावंडाचेर सायरन बसयल्यात. तांच्या आवाजाचो थळाव्या लोकांक त्रास जाता अशें संकल्प महालेन सांगलें.
पंच प्लोविया रॉड्रिग्ज, हिणे नौदलाचे भूमिके विशीं नाराजी उक्तायल्या. पयलीं नोदला वतीन थळाव्यां खातीर भलायकी शिबिरां आयोजीत करताले. विद्यार्थ्यांक शाळेंत वचपाक बशीची वेवस्था करताले. आतां सगलें बंद जाला अशें तिणे सांगलें. उपसरपंच लॉरेना कुन्हान हिणे बोगमाळो आनी चिकोळणे हे नौदलान दत्तक घेतिल्ले गांव असो उल्लेख करतालेय मात आनी नौदला वतीन कसल्योच सुविधा मेळनात अशी म्हायती दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
