भांगरभूंय | प्रतिनिधी
पणजी : गोंय एस्चीट , फोरफीचर आनी बोना वेकंशिया कायदो अधीसूचीत जाले उपरांत कायदेशीर वारस नाशिल्ल्यो जमनी ताब्यात घेवपाची प्रक्रिया सरकारान सुरू केल्या. जमनी ताब्यात घेवपा खातीर नेम तयार करपाचो वावर सुरू आसा, अशें मुख्यमंत्री डॉ. प्रमोद सावंत हांणी सांगलें.
कायदेशीर वारस नाशिल्ल्यो जमनी तशेंच मालमत्ता ताब्यांत घेवपाक सरकारान गोंय एस्चीट, फोरफीचर आनी बोना वेकंशिया कायदो केला. पावसाळी अधिवेशनांत विधेयक संमत जाले उपरांत फाटल्या सप्तकांत कायद्याची अधिसुचोवणी जारी जाली. वेवसाय वा नोकरे निमतान बरेंच गोंयकार गोंया भायर आसात. तांचे मरणा उपरांत जमीन वा मालमत्ता ताब्यांत घेवपा खातीर तांचो कोणूच वारस असो ना. हाचो लाव घेवन ह्यो जमनी हडप करपाचे प्रकार जाल्यात.
सरकारन पयलेच खेपे एसआयटी स्थापन करून हडप केल्ल्या जमनींचो तपास सुरू केलो. चवकशी खातीर आयोग स्थापन करून निवृत्त न्यायाधीश व्ही. के. जाधव हांची नेमणूक केली. ‘नो मॅन्स लँड’ ताब्यांत घेवपा खातीर नेम तयार जातकच सरकार जमनी ताब्यात घेतलें, अशें डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.