भांगरभूंय | प्रतिनिधी
नवी दिल्ली, खबरां संस्था: देशांत २०१४ वर्सा सावन नोव्हेंबर २०२३ मेरेन वैजकी म्हाविद्यालयांचो आंकडो ८२ टक्क्यांनी वाडला अशी म्हायती राज्यमंत्री डॉ. भारती प्रवीण पवार हांणी राज्यसभेंत एका लेखी प्रस्नाक जाप दितना दिली. एमबीबीएसाचे जागे ११२ टक्क्यांनी वाडल्यात. जाल्यार ह्याच काळांत पीजी मेडिकलच्या जाग्यांचो आंकडो १२७ टक्क्यांनी वाडला अशेंय तिणें सांगलें.
वैजकी म्हाविद्यालयांचो आंकडो २०१४ त ३८७ आसलो. पूण तो सध्या ७०६ जाला. ह्याच काळांत एमबीबीएसचे जागे ५१३४८ वयल्यान १०८९४० मेरेन वाडल्यात. पीजी ३११८५ वयल्यान ७०६७४ मेरेन गेल्ल्याचें पवार हांणी म्हणलें. १५७ वैजकी म्हाविद्यालयांच्या बांधकामाक मंजुरी दिली. हातूंत १०८ बांदकामां सुरू आशिल्ल्याचें तिणें सांगलें.
म्हाविद्यालयांच्या बांधकामाक ३ टप्प्यांत मंजुरी दिल्ली. ताका लागून निधी केंद्र आनी राज्य सरकारांनी वांटून घेतला. येवजणेच्या मार्गदर्शक तत्त्वां प्रमाण, प्रकल्पांचें नियोजन, अंमलबजावणी आनी सुरू करप हें राज्य सरकाराचें काम. हे येवजणे खाला उत्तर प्रदेशांत २७ वैजकी म्हाविद्यालयांक मान्यताय दिली. तांतलीं १३ कार्यरत आसात, अशें पवार हांणी फुडें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
