नोवाक जोकोविचान रचलो इतिहास

भांगरभूंय | प्रतिनिधी

सर्बियाचो टॅनीस स्टार नोवाक जोकोविचान पयलो सेट व्हगडायल्या उपरांत उपत्कृश्ट रितीन पुनरागमन करीत इटलीच्या फ्लॅव्हियो कोबोलीक 6-7 (6), 6-2, 7-5, 6-4 अशा चार सेटांनी हारोवन विम्बल्डनांत दादल्यांच्या एकोडी गटाचे सेमी फायनलींत सुवात मेळयली. ऑल इंग्लंड क्लबांत जोकोविचान विक्रमी 14वे खेपे निमाण्या चारांतली सुवात निश्चीत केली. सेमी फायनलींत तो आतां संवसारीक क्रमवारींत पयले सुवातेर आशिल्ल्या यानीक सिनरा आड खेळटलो. सिनरान बेन शेल्टनाक 7-6 (2), 6-4 आनी 6-4 अशा सरळ सेटांनी हारयलो. जोकोविचाक फाटल्या चार मॅचींनी सिनरा आड हार घेवची पडल्या. ताका लागून जोकोविचा खातीर सेमी फायनल सोंपी आसची ना.

चार सेटां मेरेन चलिल्ले क्वॉर्टरफायनलींत कोबोलीन जोकोविचाचो खर प्रतिकार केलो. ताणें पयलो सेट टायब्रेकरांत 8/6 फरकान जिखून सुरवातीकूच आघाडी घेतली. पूण, उपरांत जोकोविचान आपलो अणभव पणाक लायलो. ताणें दुसरो सेट 6 – 2 असो सहज जिखलो. तिसऱ्या सेटांत कोबोलीन परतून संघर्श केलो. पूण, जोकोविचान हो सेट 7-5 फरकान जिखलो. चवथो सेट 6-4 असो जिखून जोकोविचान निमाण्या चारांतली सुवात निश्चीत केली.

ह्या जैता सयत जोकोविचान स्वित्झर्लेण्डाचो आदलो खेळगडो रोजर फॅडरराचो विक्रम मोडलो. फॅडरर 13 खेपे विम्बल्डनाचे सेमी फायनलींत पाविल्लो. जाल्यार जोकोविच 14वे खेपे सेमी फायनलींत पावलो. तशेंच वट्ट ग्रॅण्डस्लॅमांचो विचार केलो जाल्यार जोकोविचाची ही 52वी सेमी फायनल आसा. हे दोनूय संवसारीक विक्रम ताणें आपल्या नांवार केले.

सिनरा आडचे मॅची विशीं जोकोविचान म्हणलें, फ्रॅंच ओपनांत ताणें आपल्याक हारयिल्लो. आपूण आनीक बरो खेळ करपाक शकतालो. पूण, म्हत्वाच्या खिणाक तांणी बरें प्रदर्शन केलें. ताका हारोवपाची आनीक संद आपल्याक मेळ्ळ्या. सिनर सध्या उत्कृश्ट फॉर्मांत, ताका लागून जैत जोडपाक आपल्याक सर्वोत्कृश्ट प्रदर्शन करचें पडटलें.

मजगतीं, दुसरी सेमी फायनल कार्लोस अल्कराज आनी टेलर फ्रिट्स हांचे मदीं जातली. अल्कराजान क्वॉर्टरफायनलींत कॅमरन नोरीक 6-2, 6-3 आनी 6-3 अशा सरळ सेटांनी हारयिल्लो. जाल्यार फ्रिट्सान कॅरेन खाचानोवाक 6-3, 6-4, 1-6 आनी 7-6 अशा चार सेटांनी हारयिल्लो.