भांगरभूंय | प्रतिनिधी
पणजी : भारत सोडा नोटीस धाडून देश सोडिनाशिल्ल्या तिगां परदेशी नागरिकांक अधिकार्यांनी ताब्यांत घेतले. तांकां धांवडावपाची प्रक्रिया पुराय जाय मेरेन म्हापशेंच्या ‘डिटेन्शन सेंटर’त दवरल्यात.
मुंबयच्या परदेशी प्रादेशीक नोंदणी कार्यालयान ह्या तिगांक भारत सोडपाची नोटीस दिल्ली. मात, आदेश पाळिनाशिल्ल्यान तांकां ताब्यांत घेवन ‘डिटेन्शन सेंटर’त दवरलां. भारतांत रावपाची तांची कायदेशीर मुदत सोंपिल्ली आनी तांणी देश सोडपाचें गरजेचें आशिल्लें. मुजत सोंपोनूय भारतात राविल्ल्यान कारवाय करची लागिल्ल्याचें सुत्रांनी सांगलें.
एफआयआरओन देश सोडपा खतीर दिल्ले मुजतींत देश सोडिनासतना बेकायदेशीरपणान रावपाचे आशिल्ले. पणजेच्या एफआयआरओच्या कार्यालयान तांकां सोदून काडून ‘डिटेन्शन’ केंद्रांत खाडले.
भारतांत रावपाची मुजत सोंपुनय खुबशे विदेशी बेकायदेशीरपणान गोंयांत रावतात आनी हाका लागून खुबश्यो समस्या निर्माण जाल्ल्याचें अधिकृत सुत्रांनी सांगलें.
सध्याच्या स्थलांतर नेमां प्रमाण चडशे पर्यटक व्हिसाधारकांक ९० दिसां भितर देश सोडप बंधनकारक आसता. कांय विशिश्ट व्हिसां खातीर १८० दिसां मेरेन मर्यादित अपवाद लागू जावपाक शकता. गोंय कार्यालयाच्या अहवालावेल्यान व्हिसा मुजतवाड अर्जांची तपासणी मुंबयच्या एफआरआरओ कार्यालयांत करतात. अर्ज भायर मारल्यार देश सोडून वयचें पडटा. थारायिल्ले तारखे उपरांत लेगीत देश सोडलो ना जाल्यार तें बेकायदेशीर जाता आनी ते उपरांत ‘भारत सोडची’ नोटीस जारी जाता अशें एका अधिकार्यान सांगलें.
त्या तिगांयनी व्हिसा अटींचे नेम मोडले
दोन रशियन बायलांचो खून प्रकरणांत हालींच रशियन नागरिक अलेक्सी लिओनोवाक अटक केल्या. अटक केल्ल्या अलेक्सी आनी दोनूय खून केल्ल्या बायलांनी व्हिसा अटी मोडिल्ल्याचें सुत्रांनी सांगलें.
हेर परकी नागरिकांच्या व्हिसा अटींची चवकशी
मजगतीं, राज्यांतल्या हेर परकी नागरिकांच्या व्हिसा स्थितीची चवकशी सुरू आसा अशें सूत्रांनी सांगलें. कांय जाण पर्यटन व्हिसाचेर काम करतात अशें दिसून आयलां. कांय जाण व्हिसा सोंपले उपरांत लेगीत देशांत रावल्यात अशें दिसून आयलां अशें अधिकृत सुत्रांनी स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
