नोटिफीकेशन

भांगरभूंय | प्रतिनिधी

आरे!! रुपेश कसो आसा, खूब वर्सांनी आयज बसींत.. बरें ते सोड Merry Christmas आयज यो आमगेर उगडासान नातलांक. फाटल्या वर्सां येता म्हणून शेवटाक येवकूच ना.. ह्या वर्सा तरी यो सायबा.

चार वण्टी मदल्या बंदखणींत अस्पश्ट तरेन हातांतलो मोबायल सासपयत रूपेश घडयाळीचो काटो बारा वरांचेर केन्ना पावतलो हाची उमळशीकेन वाट पळयतालो. वेळा वांगडा वर्सां कशी सरता हाची जाणीव ताका आयज जावंक लागली. शेजारच्या माळयेर चकचकपी नखेंत्राचो उजवाड जनेलांतल्यान आपल्याक परबीं भेटयता आनी खांद्यार तांबडे पोतयेंत सांतानान आपल्याक कसलें गीफ्ट हाडला आसतलें हाची आतुरताय ताच्या दोळ्यांत स्पश्ट जाणवताली. ह्या सगळ्या विचारांच्या घुसपागोंदळांत सांपडचे पयलींच ताचो मोबायल Merry Christmas  ह्या मेसेजीच्या नोटिफीकेशनान भरलो. ज्या खिणाची रुपेश वाट पळयतालो जुस्त ताचे उरफाटें घडलें. आयज 25 डिसेंबर म्हजो पंचवीसावो वाडदीस कोणाकूच याद ना काय.. चिंतनाच्या ह्या प्रवासांत पुराय रात केन्ना जागयली हें ताका कळ्ळेंच ना. 

शेवटाक दीस उदेलो, सदच्या परी आज सुर्य  काय म्हजे मन निर्शेला.. आसू आयज दुख्खाचो न्हय खोशयेचो सण.. आपले परेन सत्य गिळून रुपेशान मनाक समजायले. काल बाजारातल्यान हाडिल्ल्या नव्या बुशकोटाक फेर मारून ताणी देवळांत वचपाची तयारी सुरू केली. जिवीताच्या दरेक खीणाक आदार दिवपी मोटारसायकल आयज आपल्यार रागार जाल्या काय, अर्द वर जालें ही चालू कित्याक जायना… ताणाचो भार हळूहळू रूपशेच्या माथ्यार चडूंक लागलो. देवूळ तशे पयस नाशिल्ले, पूण निर्शेल्या मनान मोटारसायकलीक नियाळीत ताणें बसींत वचपाचे थारायलें. मेरशेच्यान पणजे वचपी बस आज उसरां कित्याक ह्या विचारान मनात घर करचे पयलींच बस ताच्या मुखार येवन थांबली. बसींत पयलें पावलं दवरताच, आरे!! रुपेश कसो आसा, खूब वर्सांनी आयज बसींत.. बरें ते सोड Merry Christmas आयज यो आमगेर उगडासान नातलांक. फाटल्या वर्सां येता म्हणून शेवटाक येवकूच ना.. ह्या वर्सा तरी यो सायबा. 

बसींतल्यान देवपाचे ताकतिकेन रूयेलान रूपेशाच्या मनाक पडिल्ल्या घाव्याक खरपीलें.. शाळेच्या सुमार सात वर्सा उपरांत ताका रूयेल दिशिल्लो. फाटल्या वर्सा वरवी अंदू लेगीत इतलो घट इश्ट  म्हजो वाडदिस विसरलो.. ह्याच खातीर पोरू आपूण तांगेर नातलांक वचूंक ना काय, हे चिंतत ताणें जनेलां कडेन बसका घेतली. काळो किट्ट धुंवर सोडीत बस मुखार सरली… काय वेळा उपरांत मोटारसायकलीत प्रवास करताना केन्नाच नदरेक पडनाशिल्ली शाळा आयज बसींतल्यान रूपेशाक अचकीत दिसली. पयलीं ते धावे मेरेन आपूण ज्या शाळेंत शिकला तिचें रूप आयज पुराय बदल्लां. कांय वर्सा फाटीं एक माळ्याची शाळा आयज चार माळयो उंच पावल्या. शाळा जरी नातालांच्या सुटये खातीर बंद आशिल्ली तरीय रूपेशाक आपूण शाळेंत आसताना‌ सारिल्ले मजेशीर दीस दोळ्यां सामकार येताले. 

ए रूपेश कितें रे तुजो वाडदीस वर्सान वर्स नातालांच्या सुटयेनी. पयलीं सांगता तुका आमकां पार्टी चार दीस पयलींच दिवची पडटली  नाजाल्यार आमी तुजेर कट्टी… दिता सायबानो फाल्यां या शाळा सुटल्या उपरांत वडा कडेन बाप्पाल्या गाड्यार गरम मिरची खावपाक. मिरचेचें बरें आसा चॉकलेटी मात यादीन हाड फाल्यां सकाळीं वर्गांत बसून तोंडान घालपाक. . ए चॉकलेटी नाका ती २ रूपयाची पेप्सी हाड.. ना ना आठाण्याची इमली आमट‌ आमट.. बरें बरें बेश्टो बोवाळ कित्याक फाल्यां इंटरवालाक या खावपाक. तुमकां जाय तें. ओय. .रूयेल नातालां येता दर वर्सा तू  आमकां खावपाक नेवऱ्यो हाडटा म्हणटा आनी फटयता. फाल्यां हाड यादीन नाजाल्यार तुज्या बुश्कोटार आमी मेळून चित्रां रंगयतले. मागीर घरा वचून खा तापसाणी.. बसीच्या खळखळट्या जनेलांच्या किरकिर आवजांत लेगीत रूपशाचें मन भुरगेपण जियेतालें. 

शाळेंत असताना लेगीत तो असोच बसींत प्रवास करतालो. त्या वेळार मात शाळेची बस गच्च भुरग्यांनी भरताली… ओय, रूयेल लास्ट सीट धर बेगीना कोण बसपा पयलीं.. म्हाका मात विंडो सीट दवर. नाजाल्यार तुका बसींत घरा पावसर उबो दवरतलों. एकामेकांची फकांडां मारीत हांसत खेळत शाळेंतल्यान घरां परतूपाची धा मिनटांची वाट खूबशें गोड अणभव साठयतालें. हरशी पुराय शाळेंत रूपशाचो वाडदीस लागीं पावला अशें गाराणे घालपी इश्ट आयज व्हड जाला काय कामांत खरेंच व्यस्त उरला..

टिकेट टिकेट.. अचकीत कंडक्टराच्या आवाजांत रूपेश भानार आयलो. जनेलां भायर नदर भोंवडायली बस सामकी देवळा मुखार येवन थांबलेली, रूपशान २० रूपयाची नोट कंडक्टराच्या हातांत दवरून  काय वळखीच्या लोकांक मनांत दुख्ख असून लेगीत फटीचो हांसो मुखामळार घेवन बसींतल्यान सरळ देवळाची वाट धरली. 

देवा विघ्नहर्ता, बुद्धिच्या दाता गणराया. आयज म्हजो वाडदीस, लागी पयशिल्ल्या म्हज्या सगळ्या इश्टांक म्हज्या वाडदिसाची नोटिफीकेशन पावय रे म्हाराजा… अशें मनांत गाराणें घालीत देवा मुखार नाक घश्टीलें. दोळे धापतांच रूपेशाक  ल्हान असतनाची पुराय रिकोडेट कॅसेट रिप्ले जाता अशें दिसूंक लागलें. रूपेश ! ओ रूपेश तुजे मरे सदाचें जाला. कितलो वेळ तुका रंगपाक यो सडसडीत. रामू काकाल्यो काजी चोरूंक वचूंक जाय. बेश्टो वेळ करनाका उपरांत व्हाळांत न्हावपाक…देवा सायबा. वाडदिस म्हणून चडूंच नटोन येता काय कितें रे. येता जाल्यार यो नाजाल्यार चल्ले आमी. ल्हानपणाची इल्यो इल्यो यादी दोळ्यां मुखार दिसता थंय आसा ..टण!!!!! देवळाची घांट वाजली. 

विचारांच्या खोल दर्यांत देविल्ल्या रूपेशान आपल्या हातांतल्या घडयाळीर लक्ष मारले…आब्बा!! इतलो वेळ कसो काय जालो. आनी कामा उरल्यात. सरता हांव भायर.. आपल्या भितर बडबडीत रूपेश दनपारचो बाजारांत आनी सुर्य मावळपा पयलीं घरा पावलो. घरा पावताच खरशेत निरशेत ताणें बाजाराची सामानाची पोती फ्रीजा कुशीक दवरली. कुडकुडाच्या थंडेत थंडूच उदक न्हालो आनी मोबायल घेवून वॉटसेपार…म्हज्या वाडदिसा निमतान आपलो मोलादिक वेळ काडून म्हाका परबीं भेटोवपा खातीर तुमचें सगळ्यांचे चडान चड देव बरें करूं… असो स्टेटस अपलोड केलो ताच्या उपरांत  .. Sorry for the late wish Happy birthday Rupesh.. ह्या मेसेजीची नोटिफीकेशन मात ताका फाटोफाट येत रावली.

विष्णू नार्वेकार

7709868431