भांगरभूंय | प्रतिनिधी
दक्षीण गोंय जिल्होधिकारी कचेरेंत वकिलां खातीर बार रुमाची वेवस्था
मडगांव: गोंयांत जमीन हडप प्रकरणाचो मुद्दो सद्या तेंगशेर आसा. कांय नोटरींच्या सहभागा बगर हें करप शक्य ना. आपूण कोणाचेरूच बोट दाखयना जाल्यार हें घडत आसा ताची म्हायती दितां. हें बदलपा खातीर यत्न जावपाची गरज आसा अशें कायदो मंत्री आलेक्स सिक्वेरा हांणी सांगलें. वकील संरक्षण विधेयकाचेर सद्या कांयच आस्वासन दिनात, पूण हें विधेयक हाडून कायदो करपा खातीर नक्कीच यत्न करतलों अशेंय तांणी स्पश्ट केलें.
दक्षीण गोंय जिल्हो वकील संघटणे कडल्यान दक्षीण गोंय जिल्होधिकारी कचेरेंत वकिलां खातीर बार रुमाची वेवस्था करची अशी मागणी हाचे पयलीं कायदो मंत्री आलेक्स सिक्वेरा हांचे कडेन केल्ली. ते प्रमाण चर्चा लेगीत जाल्ली आनी कार्यवाही लेगीत सुरू केल्ली. बुधवारा दक्षीण गोंय जिल्होधिकारी कचेरेंत वकिलां खातीर बार रुमाची सुविधा उपलब्ध केली. जाचें उक्तावण मंत्री आलेक्स सिक्वेरा हांचे हस्तुकीं केलें.
ह्या वेळार दक्षीण गोंय जिल्हो वकील संघटणेचे अध्यक्ष प्रसाद नायक, अतिरिक्त जिल्होधिकारी श्रीनेत कोठवाळे, उदय देशप्रभुदेसाय, अॅड. दिलेश्वर नायक बी मानेस्त हाजीर आशिल्ले.
दक्षीण गोंय जिल्हो वकील संघटणेचे अध्यक्ष प्रसाद नायक हांणी सांगलें, सद्या वकिलांचे सुरक्षेचो प्रस्न तेंगशेर आयला. वकिलांचेर हल्लो करपाच्यो घडणुकोय घडल्यात. हाका लागून वकिलांचे सुरक्षेचे नदरेंतल्यान गोंय सरकारा कडल्यान वकील संरक्षण कायद्याची निर्मिती करपाची गरज आसा अशी मागणी केली.
मंत्री आलेक्स सिक्वेरा हांणी सांगलें, सबरजिस्ट्रार कचेरेंत कांय चुकीच्यो गजाली घडत आसतात अशें दिसून आयलां. वकिलाच्या सहकार्या बगर कचेरेंतल्यो चुकीच्यो गजाली आपूण बंद करूंक शकना. चुकीच्यो गजाली करचो ना अशें थारायल्यार हें शक्य आसा. खूबशे फावटी ऑनलायन पद्दतीन अर्ज सादर करतना पांच ते स फावटी अर्ज करतात आनी ताका लागून वेटींग लिस्ट वाडटा. प्रक्रिया सुरळीत करपाचो आपलो यत्न आसा. नोटरी कडल्यान लाखांनी कागदपत्रां प्रमाणीत करतात. उत्तर आनी दक्षीण गोंयांत जमीन हडप प्रकरणां मुखार आयल्यांत. नोटरींच्या सहकार्या बगर हें शक्य ना. आपूण कोणाच कडेन बोट दाखयना जाल्यार जें जाता ताची म्हायती दितां. ताका लागून ही प्रक्रिया सुरळीत आनी पारदर्शक जावपा खातीर वकिलांच्या सहकार्याची गरज आसा अशेंय तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
