भांगरभूंय | प्रतिनिधी
शिक्षण पुराय जालें काय तरणाटे नोकरी सोदतात. भोवतेकांक सरकारी नोकरीच जाय आसता. ताचे फाटलीं कारण अर्थांत सगल्यांक खबर आसात. ही नोकरी एकदां मेळ्ळी, काय कायमस्वरुपी. अर्थांत फाटल्या कांय वर्सां सावन कंत्राटी पद्दतीन कर्मचारी भरती जाता. पयर गोंय सरकारी कर्मचारी भरती आयोगाचे वेबसायटीचें लोकार्पण जालें. तातूंत नोकरेची जायरात, संगणक आदारीत वा लेखी परिक्षेची म्हायती, अभ्यासक्रम, अर्ज भरपाची सुविधा आसतली. सप्टेंबरा सावन रिकामी जागे भरपाची प्रक्रिया सुरू जातली आनी नोव्हेंबरांत परिक्षा. आतां सरकारी खात्यांत कितले जागे रिकामी आसात, ताची म्हायती आयोगाक दिवची पडटली. उपरांत परिक्षा आनी नोकर भरती. सगल्यांत म्हत्वाचें म्हणल्यार पात्र उमेदवारांचेर अन्याय जावचो न्हय आनी सरकारी नोकर भरतेंत पारदर्शकताय येवची हे खातीर सरकारान हो निर्णय घेतला. म्हणटकच हाचे मुखार लांच दिवन- घेवन वा वळखीचो वशिलो लावन कोणाकूच नोकरी हातासपाक मेळची ना. सरकाराचो हेतू येशस्वी जावं अशें मागुया.
तशी नोकरी ही पात्र उमेदवारांकूच मेळपाक जाय. राष्ट्रीय- आंतरराष्ट्रीय पांवड्या वयल्यो कंपनीं नोकरी दितात, ते उमेदवारांची लायकी तपासूनच. लायक व्यक्ती कांय वर्सां भितर सोंपणा चडून वयर पावतात आनी उरिल्ले आसा थंयच उरतात वा नोकरेंतल्यान गळटात. सरकारी मळारुय कर्मचाऱ्याची गुणवत्ता बडटी दिवपाच्या वेळार तपासतात. आतां नोकरी दितनाय ती पळयतले. परिक्षेंत पास जावप्यांकूच नोकरी मेळटली. तांकां जें काम दितात, तातूंत ते कितले हुशार आसात, कितली सुदारणा जाल्या, हाची तपासणीय दरवर्सा करप गरजेचें. कुशळटायूय विकसीत करपाक जाय, तशें केल्यार ताचो फायदो सरकारी यंत्रणेक, पर्यायान राज्याक जातलो. उदरगतीचे दिकेन उडणां मारप सोंपें जातलें. सरकारी नोकरी मेळिल्ल्या वा फुडाराक ते खातीर यत्न करपी लोकांनीय हाचेर विचार करचो. सरकारी नोकरांचेर आरोप जातात, ते फटीचें हें सिद्ध करपाक तांणी वावुरचें. इत्साशक्त आसल्यार हें अशक्य न्हय. सरकारी कचेरेंत वेळार कामार येवप- घरा वचप, येवपी लोकां कडेन नमळायेन वागप, काम शक्य तो बेगीन करून दिवप, ते खातीर भेटवस्त, पयशे घेवपाक न्हयकार दिवप…. हीं पथ्यां पाळ्ळ्यार सरकारी यंत्रणा नेटान धांवपाक लागतली. तिचो लोकांक फायदो जातलोच, पूण कर्मचाऱ्यांक करियराचे नदरेन लाव जातलो.
सगलेच कर्मचारी कामचुकार नात, पूण जे आसात, तांचेर खात्याच्या मुखेल्यान नदर दवरल्यार बरी. आमदार- मंत्र्यांच्या वशिल्यान लागिल्ले, उर्मट सभावाचे शेंकड्यांनी कर्मचारी आसात. ते कोणाक भियेनात. कामा खातीर कचेरेंत येवपी लोकां कडेन पसून ते वाद घालतात. कांय कर्मचाऱ्यांची ‘लांच घेवप, कामचुकारपणा करप हो म्हजो जल्मसिद्ध हक्क’ असो समज करून घेतला. सरकारी यंत्रणांक अडचण थारपी ह्या कर्मचाऱ्यां खातीर सरकारान व्हीआरएस येवजण आखूंक फावो. शक्य आसल्यार निवृत्ती पिराय एक वर्स उणी करुं येता. लोकप्रतिनिधींच्या सांगण्या वयल्यान कांय कर्मचाऱ्यांची पयस बदली करतात, मानसीक छळ करतात. दुसरे वटेन, वर्साचीं वर्सां एकाच जाग्यार काम करपी सरकारी जावंय, सुनो आसात, तांचेरुय लक्ष जाय. तो कर्मचारी कोणाचो (म्हणजे कोणे ताका त्या खात्यांत दसयला) हाचो विचार करीनासतना कायद्यान कारवाय जावंक जाय. प्रामाणीक कर्मचाऱ्याक ताच्या कश्टाचें बेगीन फळ मेळपाक जाय.
कर्मचारी भरती आयोगाच्या वेबसायट लोकार्पणा वेळार परिक्षेंत बरे गुण मेळयिल्ल्यांची वळेरी आयोगाच्या नोटीस बोर्ड आनी वेबसायटीचेर घालपाची घोशणा जाल्या. जो चड गुण घेता ताची निवड. पूण, उपरांतूय तो त्या कामाक योग्य आसा काय ना तेंय पळोवचें पडटलें. ह्यो सगल्यो परिक्षा पारदर्शकपणान जावंक जाय. परिक्षेक नांव एकल्याचें, पेपर बरयता दुसरोच, अशें जावंक फावना. पेपर कोरे दवरून मागीर ते भलत्यांनीच बरोवप, अशें पसून जावपाची भिरांत आसता. आयोगान हाजेर कडक नदर दवरची पडटली. परिक्षा पद्दतीक लागून आपल्या खात्यांनी आपल्याच मतदारसंघांतले उमेदवार भरपाक मेळचें नात. ताका लागून कांय आमदारांचो घुस्मटमार जातलो. वशिल्यान नोकरी मेळटली हे आशेन राविल्ले तरणाटे फुगार जातले. हरकत ना. गोंयांत जगतलो जाल्यार उणीच 25 हजार रुपया पगाराची नोकरी जाय. आतां सरकाराच्या नव्या निर्णयाक लागून कोणाचेरूच अन्याय जावचो ना, अशी आस्त बाळगुया!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
