भांगरभूंय | प्रतिनिधी
घोटाळो प्रकरणांत प्रधानमंत्र्यांक पत्र बरोवपाचो निर्णय
मडगांव: काँग्रेस, आप, आरजी आनी गोवा फॉरवर्ड पक्षांच्या सगल्या सात विरोधी आमदारांनी मडगांवां बसका घेतली. नोकरे खातीर पयशे घेवपाच्या प्रकरणांत पात्र उमेदवार वंचीत उरले. ताका लागून ह्या प्रकरणांत हस्तक्षेप करपा खातीर प्रधानमंत्री नरेंद्र मोदी हांकां पत्र बरोवपाचो निर्णय घेतला अशें विरोधी पक्ष फुडारी युरी आलेमांव हांणी सांगलें.
मडगांवां एका हॉटेलांत विरोधी आमदारांनी बसका घेतली. ह्या वेळार विरोधी पक्ष फुडारी युरी आलेमांव, आमदार विजय सरदेसाय, क्रुझ सिल्वा, व्हेंझी व्हिएगश, विरेश बोरकार, एल्टन डिकॉस्टा, अॅड. कार्लुस फेरेरा हाजीर आशिल्ले.
नोकर भरती घोटाळो प्रकरणांत राज्यांतल्या पात्र तरणाट्यांचेर अन्याय जाला आनी हाचेर फुडली भुमिका थारावपा खातीर हे बसकेंत चर्चा जाली.
उपरांत आलेमांव हांणी सांगलें, गोंय पुलीस जे पद्दतीन तपास करतात आनी भाजपाच्या मंत्र्यांक ‘क्लीन चीट’ दितात ते धपको दिवपी आसा. ह्या प्रकरणांतलें ‘व्हड नुस्तें’ पुलिसांक सांपडचे नात. कारण सद्या पुलिसूच भाजपाचे म्हणयारे जाल्यात.
म्हाड्डोळ पुलिसांनी जाका अटक केली तो भाजपाच्या एका मंत्र्याचो कर्मचारी आशिल्ल्याची म्हायती मेळ्ळ्या. नोकरी विकून पयशे जोडपा खातीर मंत्र्यांनी अशें खूबशे एजंट दवरिल्ले आसूंक शकतात. तांची चवकशी जावंक जाय आनी ते खातीर हो गंभीर विशय आशिल्ल्यान ह्या प्रकरणांत हस्तक्षेप करपा खातीर आनी न्याय मेळोवपा खातीर प्रधानमंत्र्यांक पत्र बरोवपाचो निर्णय घेतला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
