भांगरभूंय | प्रतिनिधी
पणजी : नोकरे खातीर पयशे दिवपाचीं प्रकरणांं दिसांन दीस उक्तीं जायत आसात. ह्या भानगडेची निवृत्त न्यायाधीशा वरवीं चवकशी करची, अशी मागणी आम आदमी पक्षान केल्या.
चवकशे खातीर सरकारान निवृत्त न्यायाधीशांंची समिती स्थापन करची. ह्या समिती वरवीं चवकशी करची, अशी मागणी आपचे गोंयचे मुखेली अॅड. अमीत पालेकार हांंणी केली. नोकरे खातीर पयशे दिवपाच्या भानगड प्रकरणी आम आदमी पक्षान मेरशें जंंक्शनाचेर निदर्शनां केली. मुखेली अॅड. अमीत पालेकार, आमदार क्रुज सिल्वा हांंचे सयत हेर कार्यकर्ते हाजीर आशिल्ले. हातांत तकटे घेवपा सयत घोशणा दिवन आपान निशेध केलो.
नोकरे खातीर पयशे घेतले म्हूण जांकां अटक केल्या तांंचे फोन कॉल्स तपासपाचे. हातूंतल्यान बरेच घबाड उक्तें जातलें. कोट्यांंनी रुपयांंची ही भानगड आसा. हातूंत सरकारा मदल्या उच्च पदस्थांंचो हात आसा, असो आरोप अमीत पालेकार हांंणी केलो.
नोकरे खातीर पयशे दिवचे पडटा, अशें चित्र तयार जाला. हाका लागून ह्या प्रकरणाची न्यायाधीशा वरवीं चवकशी जावपाक जाय, अशी मागणी आमदार क्रूज सिल्वा हांंणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
