भांगरभूंय | प्रतिनिधी
नवी दिल्ली, खबरां संस्था: कंबोडियांत ६५० परस चड भारतीय नागरिकांक ‘सायबर स्लेव्ह’ म्हळ्यार एके तरेचे गुलाम म्हणून कामाक दवरून तांकां फटोवपाचे प्रकार चल्ल्यात. कंबोडियांतल्या भारतीय दुतावासान ह्या भारतीय नागरिकांक सोडवपाचे यत्न सुरू केल्यात. ६५० परस चड भारतीय नागरिकांक सोडवप आनी तांकां परतून हाडप हो आमचो हेत आसा आनी तांची सुटका मेळोवपा खातीर आमी थळाव्या अधिकार्यां वांगडा वावुरतात अशें दूतावासान शेनवारा (२० जुलय) जाहीर केलें. हे सगळे भारतीय नागरीक नोकर्यांच्या हांयसाक भुल्लूसून कंबोडियाक आयल्यात. नोकरी मेळटली अशी आस्त बाळगून आयिल्ल्या ह्या भारतीयांक फटोवन कंबोडियांत सायबर क्राय्म ऑपरेशनांत गुंतयल्यात.
भारतीयांक मुक्त करपाचे यत्न
हे भानगडींतल्यान भारतीय नागरिकांक सोडवपा खातीर भारतीय दूतावासान हालींच कंबोडिया पुलिसांक सविस्तर म्हायती दिल्या. तांकां सहकार्य दिवन सगल्या भारतीयांक सोडवपाचे यत्न सुरू आसात. हाका लागून आतां मेरेन १४ भारतीय नागरिकांक सोडयल्यात. आतां सोडयिल्ल्या मनशांची जतनाय कंबोडिया सरकारा वांगडा काम करपी एनजीओ घेता.
भारतीय दूतावासान कितें म्हणलें?
आमी सतत परिस्थितीचेर नदर दवरतात आनी कंबोडियांत आडकून पडिल्ल्या भारतीय नागरिकांचे सुरक्षितताये खातीर आनी बर्या खातीर कटिबद्ध आसात अशें भारतीय दूतावासान हालींच जाहीर केल्ल्या निवेदनांत म्हणलां. कंबोडियांतल्या खंयच्याय नोकरी ऑफरी विशीं जतनाय घेयात; तशेंच, कसलोय दुबाव आसल्यार आमकां हे विशीं बेगोबेग कळोवचें असो सल्लो दुतावासांनी दिलो.
हें प्रकरण उक्ताडार कशें आयलें?
सध्या कंबोडिया पुलिसांनी सुटका केल्ल्या १४ भारतीय नागरिकांतले चडशे बिहार आनी उत्तर प्रदेशांतले आसात. केंद्र सरकाराच्या एका कर्मचार्यान एफआयआर दाखल केल्या उपरांत हो व्हडलो घोटाळो उजवाडाक आयलो. ह्या कर्मचार्यान फाटल्या वर्सा ३१ डिसेंबराक कागाळ दाखल केल्ली. ह्या घोटाळ्यांत ताका ६७ लाखां परस चड लुकसाण जाल्लें. ते उपरांत कंबोडियांत ह्या घोटाळ्यांत वांटो घेवपी आठ जाणांक अटक केली. रोजगाराचें हांयस दाखोवन भारतीयांक कंबोडियांत हाडून भारतीयांक फटोवपाचो आरोप ह्या आठ जाणांचेर केल्लो. परराश्ट्र मंत्रालयाच्या म्हणण्या प्रमाण फटयल्ल्या भारतीयांक ‘कायदेशीर’ नोकर्यो दिवपाचें उतर दिल्लें. पूण उपरांत ताका ‘सायबर स्टॅमींग’ कॉल सेंटरांत काम करपाक लायलें. हें कॉल सेंटर भारतांतल्या लोकांक लक्ष्य करतात. देखून, अशा नोकर्यां पासून सगळ्यांनी सादूर रावचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
