भांगरभूंय | प्रतिनिधी
मुख्यमंत्रीः स्वयंपूर्ण गोंय खाला कृशी आनी शिक्षण खात्याचेर दितले भर
भांगरभूंय । प्रतिनिधी
पणजीः गोंयांत कांय खाजगी अभ्यासक्रम घेवपी संस्था विद्यार्थ्यांक नोकरी दिवपाचीं फटीचें हांयस दाखयतात. अश्या संस्थांचेर खर कारवाय करतले, अशी शिटकावणी मुख्यमंत्री डॉ. प्रमोद सावंत हांणी दिली.
शेनवारा मुख्यमंत्री व्हर्चुअल पद्दतीन गोंयांतल्या स्वयंपूर्ण मित्रांक संबोधीत करताले. ह्या वेळार स्वयंपूर्ण गोंय खाला कृशी आनी शिक्षण खात्याचेर भर दितले, अशें मुख्यमंत्री डॉ. सावंत हांणी स्पश्ट केलें. हे कार्यावळीक कृशी खात्याचे संचालक संदीप फळदेसाय, शिक्षण खात्याचे संचालक शैलेश झिंगडे हांचे सयत विवीध गांवांतले पंच, सरपंच, अधिकारी व्हर्चुअल पद्दतीन हाजीर आशिल्ले.
मुख्यमंत्र्यान सांगलें, गोंयांतल्यो कांय खाजगी अभ्यासक्रम शिकोवपी संस्था नोकरेची हमी दितात. अश्या अभ्यासक्रमांचे शुल्क लेगीत चड आसता. तरी लेगीत जायरातीक भुलून कांय विद्यार्थी रीण काडून अशे अभ्यासक्रम करतात. मात अभ्यासक्रम पुराय जाले उपरांत तांकां नोकरी मेळना. अशी फटवणूक आडावपा खातीर खाजगी अभ्यासक्रम शिकोवपी सगळ्या संस्थांची चवकशी करपाचे आदेश शिक्षण खात्याक दिल्यात. खात्या वतीन अश्यो शिक्षण संस्था वा तांचे अभ्यासक्रम शिक्षण खात्या कडेन संलग्न आसात काय नात, संस्थांक मान्यताय आसा काय ना, ताची तपासणी करतले.
विद्यार्थ्यांनी खाजगी अभ्यासक्रम पुराय करचे आदीं ते मान्यताय पात्र आसात काय नात ताची खात्री करून घेवची. अशे अभ्यासक्रम सरकारी आयटीआयंत आसत जाल्यार तांकां प्राधान्य दिवचें. आयटीआयंत उण्या खर्चांत बरे पद्दतीचें शिक्षण मेळटा. योग्य वेळार योग्य सल्लो मेळूंक नाशिल्ल्यान कांय विद्यार्थ्यांचें लुकसाण जाता. हें टाळचे खातीर स्वयंपूर्ण मित्रांनी विद्यार्थ्यांक करिअर मार्गदर्शन उपलब्ध करून दिवचें. तांच्या मेरेन विद्यार्थ्यांच्या संबंदीत आशिल्ल्यो येवजण्यो पालोवपाचें काम करचें. योग्य करिअर केलें जाल्यार गोंयांतूच रोजगाराच्यो खूबश्यो संदी उपलब्ध जातल्यो.
अंदूं गोंयांतल्या सरकारी शाळांनी यत्ता धावेचो निकाल बरो लागला. सरकारी शाळांतल्या शिक्षणाचो दर्जो, मुळाव्यो सुविधा बऱ्यो जाल्यात. सरकारी मुळाव्या शाळांतल्या विद्यार्थ्यांक गणभेस आनी रेनकोटाचे पयशे दिल्यात. हे पयशे तांच्या पालकांच्या बँक खात्यांनी जमा जाल्यात. मदले सुटयेंतल्या खाणाचो दर्जो बरो आसपाक जाय. गांवांतले पंच, सरपंच वा हेर लोकप्रतिनिधींनी सरकारी शाळेंत वचून थंयच्या खाणाचो दर्जो तपासचो, असोय उलो मुख्यमंत्री डॉ. सावंत हांणी मारलो.
मान, काजू लागवडीक उर्बा
अंदूं कृशी खात्या वतीन मान आनी काजू लागवडीचेर भर दितले. मानीक लागून जमनीची धूप उणी जाता. आमी खात्या वतीन मानीचे रोप उण्या दरांत दितले. ह्या मानींक फुडल्या पांच वर्सांत बरें मोल मेळपाक शकता. तशेंच पोरणी काजींची झाडां काडून थंय नवीं, चड उत्पादन दिवपी झाडां लावपाकूय उर्बा दितले. स्वयंपूर्ण मित्रांनी कृशी खात्याच्यो येवजण्यो शेतकारां मेरेन पावयच्यो, अशें मुख्यमंत्री डॉ. प्रमोद सावंत हांणी सांगलें.
पीएम विश्वकर्मा येवजणे खातीर 34 हजार जाणांची नोंदणी. पिरायेची मर्यादा नाशिल्ल्यान अजून लेगीत नोंदणी शक्य.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
